Коалицијата ВЛЕН упати серија сериозни обвинувања до пратеникот и поранешен министер за правда, Блерим Беџети. Од владејачката коалиција јавно го прашуваат Беџети што направил во текот на своите 1058 дена мандат на чело на Министерството за правда за да овозможи правосудниот испит да се полага и на албански јазик.
Според ВЛЕН, одговорот е дека Беџети не направил ништо и свесно го оставил проблемот отворен.
„Цели 1058 дена беше на чело на Министерството за правда, со целосни надлежности, целосна моќ и целосна можност да го реши ова прашање. Не го направи тоа. Молчеше. Го остави проблемот отворен, а денес се обидува да се претстави како заштитник на кауза што самиот ја напушти додека беше министер“, реагираат од коалицијата.
Обвинувања за политички пазари со Груевски и Мијалков
Во партиското соопштение, ВЛЕН се повикува и на минатото, потсетувајќи ја јавноста на прислушуваните разговори меѓу Беџети и Муса Џафери.
„Граѓаните не го заборавија ниту објавениот разговор во кој, во комуникација со Муса Џафери, се слуша озлогласената реченица: ‘Ајде, еден Албанец помалку во обвинителството нема да нè однесе во Рај’. Оваа реченица не е лапсус, туку начин на размислување. Таа покажува како Албанците биле третирани со години од оние кои знаеле да зборуваат во име на народот, а зад затворени врати ги продавале позициите“, велат од ВЛЕН.
Од коалицијата додаваат дека токму поради ваквиот пристап не било решено прашањето за правосудниот испит, а работните места наменети за Албанците, според нив, завршувале во политички пазари со тогашната власт и со мрежите на Никола Груевски и Сашо Мијалков.
ВЛЕН најавува решенија за наследените проблеми
Од владејачката коалиција порачуваат дека на Албанците не им се потребни „патриоти со изборен рок на траење“, туку претставници кои нема да ги продаваат националните интереси за функции и личен опстанок.
На крајот од соопштението, ВЛЕН уверува дека нема да дозволи неправдите од минатото да останат товар за новите генерации, најавувајќи дека се решени постепено да ги исправат и решат сите проблеми што со години биле запоставувани од страна на ДУИ. Тие потенцираат дека студентите и правниците заслужуваат конкретни решенија, а не лажен патриотизам за дневнополитички потреби.
