Преку масовна велосипедска тура која поврза три града и две држави, Струга викендов беше домаќин на завршниот настан од овогодишната богата програма за одбележување на Денот на Европа. Со оваа спортско-културна манифестација се заокружи серијата настани кои во текот на мај и почетокот на јуни се одржаа во повеќе градови низ земјава под мотото „Наша Европа. Посилни заедно“. Настанот беше организиран од Јуроп хаус и Делегацијата на Европската Унија во Северна Македонија, во блиска соработка со нивните партнери од Албанија, како и со општините Струга, Поградец и Охрид.
Велосипедистите ја извозеа прекуграничната рута од Струга, преку Поградец и Охрид, па назад до почетната точка, испраќајќи силни пораки за одржлива мобилност, прекугранична соработка, активен животен стил и отворени јавни простори. Во турата активно учествуваа и претставници на амбасадите на земјите членки на ЕУ, предводени од заменик-шефот на Делегацијата на ЕУ во Скопје, Бен Нупнау, словенечкиот амбасадор Грегор Прескер, заменик-амбасадорот на Австрија, Матијас Хуменбергер, како и претставници од Амбасадата на Словачка.
Заменик-шефот на Делегацијата на ЕУ, Бен Нупнау, истакна дека оваа велосипедска тура го носи вистинскиот дух на Европа – отворена, инклузивна и секогаш во движење напред. Тој посочи дека со изборот на две тркала наместо четири, учесниците покажале дека малите, одржливи избори носат големи промени за здравјето, планетата и заедниците, оценувајќи ја рутата како круг на пријателство и заедничка посветеност. Градоначалникот на Општина Струга, Менди Ќура, изрази задоволство што неговиот град е домаќин на манифестацијата, нагласувајќи дека Струга е жив доказ оти европските вредности и соживотот не се само теорија или слоган, туку секојдневен начин на живот во кој различните култури и традиции ги прават граѓаните посилни.
Паралелно со спортскиот дел, Паркот на поезијата во Струга беше претворен во жив културен центар. Локалното население и посетителите уживаа во базар на мали бизниси, креативни работилници, детски програми, улични акробати и целодневна музичка програма поддржана од локални здруженија и партнери. Како дел од настанот беше отворена и изложбата на фотографии „Еуро Вело: Најдобрите европски рути за велосипедски патувања“ од авторот Симон Тред, посветена на промоцијата на активниот туризам.
Со манифестацијата во Струга се заокружи едномесечниот европски караван поддржан од тимот амбасади на ЕУ. Програмата претходно донесе низа автентични содржини низ земјата: еколошки и гастрономски пазар во Скопје, масовна акција за пошумување. околу езерото Младост во Велес, отворен концерт на групата Фанк Шуи во Битола, саем на книгата во Тетово, како и специјализиран младински саем за студирање и мобилност во Штип. Организаторите порачаа дека пораката од сите овие градови е единствена – дека европските вредности се градат секојдневно преку соработка на луѓето и идеите кои нè прават посилни заедно.
