Претседателот на Владата, Христијан Мицкоски, одговарајќи на новинарски прашања по учеството на состанокот на Центарот за извонредност во финансиите (ЦЕФ), најави очекувања за сериозно поевтинување на нафтените деривати во земјава. Според владините математики и калкулации направени врз основа на движењата на светските берзи, премиерот истакна дека се очекува пад на цената на бензините за 2,5 до 3 денари, додека кај дизелот се предвидува уште подрастично намалување од околу 7 денари по литар. Мицкоски сепак потенцираше дека конечниот збор и официјалните математики ги носи Регулаторната комисија за енергетика (РКЕ) која треба да излезе со новата одлука.
Прашан за влијанието на глобалните геополитички процеси, поточно за стабилизацијата на пазарот со оглед на информациите дека околу 55 трговски бродови неодамна поминаа низ стратешкиот Ормутски теснец, Мицкоски посочи дека оваа бројка не треба да се гледа како драматична бидејќи во минатото дневно низ овој теснец поминувале и троцифрен број танкери. Тој појасни дека на овие танкери им е потребно подолго време, односно околу 25 до 35 дена за да стигнат до своите крајни дестинации, што значи дека ефектите не се видливи веднаш на пазарот.
Врз основа на овие анализи, премиерот оцени дека цената на нафтата на светските берзи во претстојниот период ќе се стабилизира и ќе се движи во рамките на околу 80 долари за барел, со евентуални минимални осцилации од неколку долари нагоре или надолу. Владата очекува дека овие движења на светските пазари постепено ќе рефлектираат олеснување и на домашниот пазар на мало, со што ќе се намали притисокот врз буџетот на граѓаните и стопанството.
