По повод Светската недела на доење, Министерството за здравство испрати порака за важноста на мајчиното млеко, потенцирајќи дека доењето е најприродниот и најбезбедниот начин на исхрана на новороденчињата и доенчињата. Годинешното одбележување се одвива под мотото „Доење за одржлив почеток во животот – да го зајакнеме тоа што функционира“.
Според надлежните, мајчиното млеко ги обезбедува сите неопходни хранливи материи за правилен раст и развој, го зајакнува имунитетот и го намалува ризикот од бројни заболувања, што директно придонесува за подобро здравје и на мајката и на детето.
Препораки за доење и институционална поддршка
Согласно препораките на Комитетот за доење, УНИЦЕФ и Светската здравствена организација (СЗО), се препорачува исклучиво доење во првите шест месеци од животот. По овој период, се советува продолжување со доењето, комбинирано со соодветна дополнителна исхрана, до две години или подолго, во зависност од потребите на детето и желбата на мајката.
Од Министерството посочуваат дека остануваат посветени на унапредување на здравствените политики кои обезбедуваат поддршка за доењето. Ова вклучува јакнење на капацитетите на здравствените установи, едукација на здравствените работници и континуирана поддршка на бремените жени, мајките и нивните семејства.
На крајот од соопштението, Министерството упати повик за заедничка одговорност и поддршка од здравствените работници, институциите, работодавачите, семејствата и целата заедница, нагласувајќи дека создавањето услови за успешно доење претставува инвестиција во здравјето на сегашните и идните генерации.
