Поранешниот косовски претседател Хашим Тачи денеска е прогласен за виновен за воени злосторства и е осуден на 25 години затвор од страна на трибуналот за воени злосторства во Хаг. Според пресудата, 58-годишниот Тачи е осуден за кривични дела кои вклучуваат убиства, тортура и незаконско притворање, извршени во периодот кога бил врховен командант на Ослободителната војска на Косово (ОВК) за време на конфликтот и отцепувањето од Србија во 1990-тите години.
Трибуналот утврди дека тој сноси вина за убиството на 96 политички противници и лица за кои се сметало дека соработуваат со српските безбедносни сили за време на воениот конфликт, пренесува британската новинска агенција Ројтерс.
Судечкиот совет го прогласи Тачи за виновен за противзаконско апсење и лишување од слобода (точка 3), сурово постапување, мачење (точка 7) и убиство како воено злосторство (точка 9).
Пресудата утврди дека како член на главниот штаб и началник на дирекцијата за политички прашања, тој директно учествувал во формулирањето на целите на военото раководство. За овие дела советот му изрече единствена казна од 25 години затвор.
Според наодите на советот, Тачи заедно со соработниците поставувал лојални кадри на раководните позиции за да ја задржи целосната власт врз дејствувањето на ОВК.
„Многу од тие лојални лица, кои обвинетите ги именуваа или избраа, извршија кривични дела или пак знаеја дека кривичните дела се вршат во согласност со заедничката цел“, наведе претседавачот на советот.
Судот заклучи дека Тачи лично учествувал во апсењето, затворањето и сослушувањето на 13 пратеници во Ќерез и Бањица, наведувајќи ги како конкретни примери случаите со Бехајдин Алачи и Шабан Шаља, каде убиството било прикривано како „маченичка смрт“.
Наместо да ги истражи или казни сторителите во сопствените редови, Тачи активно поттикнувал неказнивост и пласирал невистинити тврдења во јавноста.
„Тачи ширеше, односно овозможуваше ширење лажни информации за затворениците и жртвите на кривичните дела што ги вршеа припадниците на ОВК, даваше лажни гаранции дека ОВК се придржува до меѓународното хуманитарно право и покажа немилосрдна способност да ги отстрани политичките пречки за да обезбеди исклучива контрола врз водењето на војната“, заклучи судот.
Во текот на целиот судски процес, поранешниот косовски претседател категорично ги отфрлаше сите обвиненија кои му се ставаа на товар.
