Американскиот концерн Џонсон и Џонсон поднесе барање до Управата за храна и лекови на САД (ФДА) за итно одобрување на неговата вакцина против коронавирус. Истото барање е доставено и до Европската агенција за лекови (ЕМА).
Позитивна одлука на ЕМА, според претставник на компанијата, се очекува до почетокот на март.
Дојче Веле објави повеќе податоци за вакцината на Џонсон и Џонсон, односно што покажаа резултатите од третата фаза на тестирањето.
Резултатите од третата фаза на клиничките испитувања на вакцината развиена од Џонсон и Џонсон покажаа дека лекот, четири недели по вакцинирањето, го намалува ризикот од умерена до тешка инфекција со Ковид-19 за 66 проценти. Фактот дека оваа бројка е пониска од онаа на другите одобрени вакцини може да се должи на мутациите на вирусот кои сè уште не беа познати за време на тестирањето минатото лето. Покрај тоа, третата фаза на клинички испитувања со учество на 44.000 луѓе во САД, Бразил и Јужна Африка покажа дека вакцината Џонсон и Џонсон е подеднакво ефикасна и кај возрасните и кај младите луѓе. Покрај тоа, една третина од испитаниците биле над 60-годишна возраст. Нема пријавено смрт или хоспитализација по вакцинирањето, што е ветувачки сигнал.
Вакцина има голем број предности. Прво, вакцина се дава во една доза, а не двапати, како што е кај повеќето други вакцини. Затоа, повеќе луѓе можат да добијат побрз пристап до лекот. Сега, со помош на тестови, развивачите се обидуваат да откријат дали втора доза дадена за кратко време ја зголемува ефикасноста на вакцината.
Втората предност е што вакцината Џонсон и Џонсон може да се чува и транспортира на температура како во обичен фрижидер. За разлика од вакцините Бионтек/Фајзер и Модерна, оваа вакцина е векторска базирана на вирус на обична настинка. Овој лек има сличности со вакцината на АстраЗенека. И двете се концентрираат врз шилестиот протеин на површината на вирусот, предизвикувајќи имунолошки одговор. Сепак, студиите покажуваат дека, за разлика од Џонсон и Џонсон, вакцината АстраЗенека е помалку ефикасна кај постарите лица.
Откако американската агенција ќе даде зелено светло за вакцината, компанијата може да почне со испорака на лекот. Во 2021 година, планира да испорача една милијарда дози од вакцината. Производството ќе се одвива во САД, Европа, Индија и Јужна Африка.
САД ќе добијат 100 милиони дози вакцини, кои компанијата мора да ги достави во првата половина на годината. Покрај тоа, тие резервираа дополнителни 200 милиони дози. ЕУ нарача 400 милиони дози од вакцината на Џонсон и Џонсон.
