По објавувањето на веста дека двете организации Театар Навигатор Цветко и Локомотива кои го развиваа „Кино Култура“ како културен центар, го напуштаат просторот заради финансиски причини, Биљана Тануровска Ќулавковски, раководителка на Локомотива во Утрински брифинг, вели дека не се врзуваат за зградата, но ќе бараат други решенија каде ќе можат да ги работат своите програми од сферата на современите изведувачки уметности и култура. Се надеваат дека и новиот закон за култура кој е во собраниска процедура ќе може да им помогне во остварувањето на овие идеи.
„Со донесувањето на новиот Закон за култура постојат можности да се промени положбата на независниот културен сектор, но за тоа требаи политичка волја. Се надевам дека ќе се најде политичка волја и соработка од страна на Министерството и министрката за култура затоашто на тој закон, во работните групи влегоа неколку колеги од иницијативата „Културата е насловна страна на општеството“ и работевме на механизмите за поддршка на независната културна сцена, а од друга страна, работевме и на проширување на правилникот за слободен уметник да бидат вклучени и културните работници. Она што денеска го гледаме е, би рекла, недолични услови за работа и работнички права на оние коишто работат на оваа сцена. Чинам дека еден до двајца се вработени затоа што не постојат можности или се вработени на друго место а дејствуваат професионално на сцената сè со цел да придонесат за развој на една современа нова култура која е можна во граѓанскиот сектор. Од механизмите на новиот закон, според мене, најзначаен е дека независната културна сцена може да се поддржува долгорочно, како и во некои други држави на Балканот. Таков е случајот во Словенија, а во Хрватска има уште подобар начин на финансирање на сцената преку посебна фондација за граѓанскиот сектор и независната културна сцена, „Култура нова“, вели Тануровска Ќулавковски.
– Значајно е што со овој нов закон за култура ќе се овозможи континуитет, како и да се поддржат и куратори, истражувачи, теоретичари, продуценти, оние кои се занимаваат интерсекторски со културата и затоа се надевам дека овој закон што поскоро ќе биде донесен“, вели за Утрински брифинг, Биљана Тануровска Ќулавковски, раководителка на „Локомотива“, културен менаџер и куратор.
