Премиерот Зоран Заев ја посети Националната установа „Танец“, каде оствари средба со директорот на ансамблот Мартин Вучиќ и со дел од вработените по повод годишнината од основањето, соопштија од владината прес-служба.
На денешен ден во 1949 година, со решение на Народното собрание на тогашната Народна Република Македонија е формирано друштво за собирање, негување и презентирање на македонското музичко-сценско творештво кое стана светски препознатливо како ансамбл – „Танец“. По тој повод премиерот Заев изрази благодарност до сите генерации играорци, пејачи, музичари, кореографи и сите останати во ансамблот, кои со огромна љубов ги чуваат народните игри и песни, обичаи и носии и преку успешните рафинирани кореографски поставки го презентираат македонскиот бит пред светот.
-Оваа наша национална установа од посебен општествен интерес, повеќе од седум децении ја остварува својата културна мисија на негување и презентирање на македонското фолклорно творештво во земјава и надвор од неа. „Танец“ е бренд што ја освојува публиката каде и да настапи. Ја освојува со својата професионалност, со совршениот изведувачки израз со кој автентично се афирмира сета убавина на нашето фолклорно наследство, истакна Заев.
Директорот на „Танец“ Мартин Вучиќ рече дека пандемијата ги погоди сите категории на луѓе и институции, а меѓу најпогодените заради природата на дејноста се изведувачките уметности и настани.
-Таков е и нашиот ансамбл, кој е должен да ја негува македонската музичко-фолклорна традиција и сценски да ја претставува, но верувам дека наскоро повторно ќе можеме да настапуваме и да ги презентираме уметничките достигнувања на ансамблот „Танец“, во неговиот полн сјај, дома и во светот, рече Вучиќ на средбата.
Како што наведува владината прес-служба, премиерот Заев нагласи дека Владата и граѓаните на земјата освен признанијата за „Танец“ за одржувањето на континуитетот на афирмацијата и чувањето на посебностите на нашето фолклорно наследство се тука за да ја изразат и заложбата за целосна поддршка на работата на „Танец“ кој го вклучува и обезбедувањето нов соодветен објект како траен дом за нивната работа и концертирање, за што веќе е донесена одлука на Владата.
/МИА/
