Продолжува трендот на зголемување на процентот на граѓани кои остануваат силни поддржувачи на Европската Унија. Зголемен е процентот на оние кои сметаат дека членството во ЕУ е „добра работа“ (70,8 проценти) и „корисна работа“ (74,3 отсто), покажува последниот ЕВРОМЕТАР од февруари 2021 кој е дел од традиционалните продукти на Евротинк.
Испитувањето, како што соопшти на денешниот брифинг Иван Стефановски, извршен директор на Евротинк, е направено од агенцијата Индаго од Скопје преку компјутерски асистирана телефонска анкета во периодот 4 февруари до 15 февруари 2021 на репрезентативен примерок од 1015 испитаници со +/- 3 проценти маргина на грешка.
Мнозинството граѓани, според испитувањето, на референдум би гласале „за“ влез на Северна Македонија во ЕУ, а зголемен е процентот на граѓани кои очекуваат влез во ЕУ во наредните пет години.
Се уште е голем бројот на граѓани кои имаат негативно мислење за односот на ЕУ кон Северна Македонија, 47,4 отсто од нив оценуваат дека односот на ЕУ кон државата е нефер, надмен и уценувачки, додека пак, 20,7 отсто сметаат дека односот е фер, пријателски, коректен.
Една третина од граѓаните (31,5 отсто) веруваат дека постои држава која претставува закана за Северна Македонија. Половина од нив (51,5 отсто) сметаат дека тоа е соседна Бугарија.
– Во однос на довербата во институциите, повторно најголем број граѓани имаат доверба во Армијата (62 отсто), потоа следи претседателот (41 проценти) и религиозните заедници (35 отсто). Најмалку доверба имаат во судството (13 отсто) и обвинителството (14 проценти), соопшти Стефановски.
Голем дел од граѓаните имаат негативна перцепција за полицијата, односно 63 отсто не се согласуваат дека полицијата во Северна Македонија е независна од политички, владини или бизнис интереси.
Од друга страна, 57 проценти од граѓаните сметаат дека полицијата добро ги извршува своите задачи за време на пандемијата со Ковид-19. Исто така, голем број од граѓаните, 65 отсто, изразуваат позитивен став за работата на полицијата во време на забраните за движење во текот на пролетта 2020 година.
Во однос на демократијата, односно дали Северна Македонија е демократска држава, повеќето сметаат дека нема демократија, а овој процент е зголемен во однос на претходниот ЕВРОМЕТАР. Околу 26 отстоо сметаат дека има демократија.
извор: МИА
