Македонскиот ракометен шампион Вардар вечерва во СЦ „Јане Сандански“ го совлада словачкиот тим Татран Прешов со 28:26 и на едно коло до крајот во групната фаза го обезбеди првото место во А-групата, пренесе МИА.
Иако ослабени без неколку стандардни првотимци, „црвено-црните“ кои се бранители на трофејот во регионалното натпреварување, успеаја да ги освојат трите бода, откако на почетокот на второто полувреме ја започнаа серијата од 10:2 и негативата од 13:18 ја претворија во позитива 23:20.
Најефикасни во победничката екипа беа Иван Чупиќ, Павел Атман и Данил Шишкарев со по пет погодоци.
Јанус Лапајне со шест гола се истакна кај Татран.
На табелата Вардар е прв со 21 бод, Мотор Запорожје има 18, Татран е трет со 15, следува Војводина со 15, Нексе има 6, Пекинг Универзитет е последен без освоен бод.
