СДСМ се менува, се подмладува и мислиме дека тоа носи прогресивност, тоа носи енергија во работата, не дозволуваме да се замрзнеме односно да се оддалечиме од реалноста со тоа што сме со чест и одговорност да ја водиме извршната власт и затоа вака динамични и кадровски и политички нови се случуваат во СДСМ, изјави утрово претседателот на СДСМ и премиер Зоран Заев. Додаде дека се развиваат огромни енергетски проекти со соседна Грција, и според него тоа се важни геостратешки приоритети. Во однос на ветото од соседна Бугарија на пристапните преговори на Северна Македонија во ЕУ, и новите прилики на политичката сцена во Бугарија по парламентарните избори од 4. април, премиерот истакна дека Брисел е запознаен со црвените линии и од нив нема отстапување, надеж дава португалското претседателство на ЕУ.
На вчерашната седница на Владата дискутиравме за законот за легализација на бесправно изградените објекти и оставаме простор да отвориме широка јавна расправа и низ транспарентна постапка да ги отстраниме што е можно повеќе од спорните делови поради кои претседателот Стево Пендаровски не го потпиша законското решение што беше донесено во Собранието, информира министерот за транспорт и врски Благој Бочварски.
Бројот на новозаболени се намалува, намален број има регистрирано и кај приемите на болни во болниците, но имаме зголемен интерес за вакцинација и мерки кои остануваат да важат до 1 јуни, вели министерот Филипче. На вакциналните пунктови во државата заклучно со вчера вакцинирани се вкупно 196.119 граѓани, а само вчера биле аплицирани 12.211 вакцини.
Кривичниот совет на одделението за организиран криминал и корупција при Основниот Кривичен суд – Скопје го одби како неоснован предлогот на одбраната на Сашо Мијалков за укинување на мерката притвор со понудена гаранција од речиси 11 милиони евра. Предлогот е одбиен и покрај позитивното мсилење од Обвинителствотот за прифаќање на понудената гаранција за пуштање на Мијаклов од притвор до правосилноста на пресудата за предметот „Трезор“ за кој доби осум години затвор.
М. Миткоска
