Под силно полициско присуство утрово започна уривањето на објектите на една од најрепрезентативните плажи во Охрид, плажата „Куба Либре“ . Правните застапници на концесионерите обвинуваат за незаконска постапка. Велат има грубо кршење на законите, јавното наддавање за концесија сè уште не е завршено по вина на локалната власт и не добиле решение за уривање.
„Сметаме дека има сериозно пречекорување на овластувањата од општината да решаваат надвор од правните регулации, односно раководење со крајбрежјето на овој начин е недозволиво. Струјата е исклучена противзаконски, објектот не работи очигледно имаме добра волја кај сопствениците да се постапи согласно упатствата на општината наложени од УНЕСКО, но сметаме дека е претерано покажување на сила“, вели Михаил Кичеец адвокат на „Куба Либре“.
Сопствениците на објектите поднеле барање до општината за одлагање на процесот на отстранување во сезона затоа што штетите се огромни, ќе бидат загубени голем број работни места, што ќе има последици и врз туризмот.
„Имаме штета од спреченост на работа и секако се заканува ризик од колабирање на повеќе сериозни економски субјекти, кои во овој момент се надеваа дека ќе се изнајде решение за нивниот статус , но истото не се случи. Штетата не е изолирана само на фирмите кои обавуваат дејност туку на повисоко ниво значи страда целиот туристички сектор во Охрид“, додава Кичеец.
„Ние најдовме начин по старата концесија да си плаќаме кирија и таа е платена заклучно со 28.02. 2021 година. Да не се прави лажна слика дека правиме некаков криминал. Не е точно дека сме заработиле 190 милиони денари профит. 516 илјади евра се во ре инвестиција, 300 илјади евра се данок кон државата и сите платени концесии. Се трудевме да бидеме светла точка во угостителството, пример сме во Охрид и во државата“, вели Хари Маловчев менаџер на „Куба Либре“.
Од општината велат по завршувањето на Куба Либре, акцијата продолжува на плажите „Кадмо“ и „Бела Виста“, а потоа на потегот кон населбата „Канео“.
„Угостителските објекти кои работат на овие плажи треба да престанат да извршуваат угостителска дејност надвор од законските процедури и да пристапат кон затворање на локалите. Остануваме посветени на исполнување на препораките на УНЕСКО и одредбите од Планот за управување со светското природно и културно наследство на Охридскиот регион. Сите нелегални градби кои претставуваат опасност за регионот и се во спротивност на режимите на заштита ќе бидат отстранети и нема да има никаква селективност во постапките. Никој не може и не смее да биде над законите и интересите на Охрид!“, стои во соопштението од Општина Охрид.
Концесионерите на плажите најавија жалби и постапки во надлежните институции.
Соња Рилковска
