За основците и средношколците денеска е последниот училиштен ден во учебната 2020/2021 година. Според изменетиот Календар за организација на работата на училиштата (основни и средни) почетокот беше одложен за 1 октомври, а бројот на наставни денови намален од 180 на 159. A надлежните ќе решаваат како наставата ќе продолжи од септември.
Со Извршна наредба на претседателот на САД Џо Бајден вчера се прошири опсегот на вонредни мерки за регионот на Западен Балкан, што опфаќа и замрзнување на имотот и забрана за влез во САД на лица кои работат против Договорот од Преспа и Охридскиот рамковен договор и нивното спроведување и ги поткопуваат мирот и регионалната соработка. Наредбата на Бајден за санкциите предизвика реакции на домашната и на меѓународната политичка сцена, со толкување на упатените пораки преку оваа постапка.
Законот за прогласување на Шар Планина за Национален парк ќе се изгласа во Собранието наредната недела. Ова се најавите на министерот на животна средина Насер Нуредини, кој беше дел од медиумската теренска посета на Шар Планина во пресрет на заштитата на овој појас. Останува само пратениците да дадат зелено светло, завршени се сите дебати во собраниските комисии, се очекува пратениците да обезбедат кворум и да се гласа законот во Собранието, тоа е чисто формално работа, истакна Министерот за животна средина и просторно планирање Насер Нуредини.
Претседателот на Бугарија Румен Радев имал видеоконференциски разговор со претседателот на Европскиот парламент Давид Сасоли. Бугарскиот претседател истакнал дека неговата земја принципиелно и доследно ја поддржува европската интеграција на Република Северна Македонија. Румен Радев посочил и дека Бугарија очекува одржливи резултати во процесот на градење добрососедски односи и во тој поглед е најважен директен и отворен дијалог меѓу двете најблиски земји на Балканот за да се постигне вистински напредок.
Прифаќањето на договорот на Рамбује на тогашното југословенско раководство, најверојатно, би довело до неспроведување на операцијата на Северно-атлантската организација (НАТО), изјави за Гласот на Америка пензионираниот генерал Весли Кларк, поранешен командант на европските сили на НАТО.
М. Миткоска
