Еден од командантите на нигериската џихадистичка група Боко Харам, Бакура Моду, потврди дека лидерот на оваа група, Абубакар Шекау е мртов.
Моду, кој се очекува да биде новиот лидер на групата, изјави дека Шекау бил убиен во борбите со ривалската група Исламска држава во Западна Африка (ISWAP), пренесуваат француските медиуми.
Моду ги повика командантите на Боко Харам да останат лојални на групата и покрај загубата на лидерот.
Смртта на Шекау се смета за главна пресвртница во нигерискиот конфликт, иако ISWAP неодамна стана доминантна сила меѓу бунтовниците на северо-истокот на земјата.
Пред десет дена, медиумите објавија дека Шекау извршил самоубиство за време на борбата против членовите на ISWAP./МИА/.
