Односите меѓу Португалија и Северна Македонија се пријателски со можност за нивно натамошно унапредување, збогатување на договорно-правната рамка, како и за развој на билатералниот политички дијалог на високо и највисоко ниво, беше констатирано на денешната средба на претседателот Стево Пендаровски со амбасадорката на Португалија во земјава, Марија Виржинија Мендес да Силва Пина.
Како што соопшти Кабинетот на шефот на државата, претседателот Пендаровски ги поздрави напорите на португалското претседателство со ЕУ за одржување во фокус на дебатата за проширување на Европската Унија и притоа се заблагодари за професионалниот пристап на Лисабон во изработката на предлогот за надминување на билатералниот спор меѓу Северна Македонија и Бугарија.
Во оваа смисла, како што се наведува во соопштението, соговорниците разменија мислења за актуелните состојби во пресрет на претстојните совети на Европската Унија, при што е нагласено дека Република Северна Македонија ги исполни барањата и заслужува неодложно да ги започне преговорите за членство во ЕУ.
