Началникот на Генералштабот на Армијата, генерал-потполковник Васко Ѓурчиновски, кој се наоѓа во официјална посета на Турција, денеска во Анкара оствари средба со началникот на Генералштабот на турските Вооружени сили, генерал Јашар Ѓулер.
Како што информираат од Генералштабот на Армијата, по пречекот со воени почести, генералите Ѓурчиновски и Ѓулер разговарале за билатералната воена соработка, при што ги разгледале можностите за нејзино понатамошно проширување преку нови облици на заеднички настап и соработка, како и интензивирање на веќе постоечката, која се состои од изведување на заедничка обука и вежби, заедничко учество во мисии и користење на капацитетите на двете армии.
Од страна на генералот Ѓурчиновски била искажана благодарност до генералот Ѓулер за досегашната безрезервна поддршка и помош која ја пружа Турција не само во интегративниот процес, туку и по нашето полноправно членство во НАТО и бројните донации во воена опрема. Генералот Ѓурчиновски го истакна и нашето заедничко учество во мировните операции, пред се во Авганистан, каде голем број наши ротации беа под покровителство на турскиот контингент.
Во рамки на посетата, армиската делегација предводена од генерал Ѓурчиновски ќе ја посети и Командата на турските специјални сили, како и дел од воено-индустриските капацитети.
– Република Турција како наш стратешки партнер претставува значаен чинител и придонесувач за модернизацијата на Армијата и нејзиното опремување со нови, современи средства, компатибилни со стандардите на земјите членки на НАТО, меѓу кои е и последната донација од влечен воз. Како дел од меѓусебната воена соработка Армијата на Република Северна Македонија учествуваше со 13 ротации штабни офицери во мисијата „Одлучна поддршка“ во Главниот штаб на Командата за обука, советување и асистенција во Кабул, за која одговорна нација е Република Турција, се вели во соопштението.
извор: МИА
