Претставата „Драма изгубена во времето“ по текст на Сашко Насев, а во режија на Владлен Александров, ќе биде изведена премиерно вечерва во 20 часот на сцената на Центарот за култура во Куманово. Улогите ги толкуваат Кети Дончевска Илиќ и Горан Илиќ, а актерка во видео е Александра Пешевска. Сценографијата е на Крсто Богојевски, костимографијата – на Кети Пауновска Стевковска, драматург е Симона Тоскиќ, а кореограф – Тања Китановска Стојковска.
Претставата му е посветена на целиот медицински персонал што се бори со ковид-19 речиси година и пол.
„Драма изгубена во времето“ е инспирирана од „Темносино, речиси црвено“ од Танасис Валтинос. Ова е претстава за животот, за луѓето во салата и уметниците и актерите, вели режисерот. Ова е, вели тој, сериозна претстава, за сериозна публика, во несериозно време.
– За целиот тој апсурден живот што го живееме, не само во последните години, туку апсурдно стана денешното време во кое сме. Ова не е политички спектакл, ова е психолошка претстава и спектакл за нашите мисли, чувства, гледање на светот во кој живееме – вели Александров.
За актерите, најубаво место е сцената, вели Горан Илиќ, кој додава дека во периодот на пандемија креативноста која треба да биде на сцената остана дома.
– Тоа не е театар. Имавме некакви си видеопрезентации, но театарот се верификува само во однос на гледачот, кога имате пред себе гледач да го чувствувате дишењето, воздишките, аплаузите и само дури тогаш театарот ја има својата вистинска функција. Имам уште малку до пензија и многу ми е важно да отидам од театарот, тој работен век да го завршам со аплаузи. Важно е да се работат добри и паметни текстови и мислам дека ова претстава тоа ќе го понуди – вели Илиќ.
Задоволство е што основата на оваа претстава е актерот и актерството, вели Дончева-Илиќ.
– Претставата е за актерот и актерството во смисла на тоа што ние актерите можеме да покажеме на сцена, но и како тематика. Оваа претстава повеќе докажува дека актерството е многу комплексна професија и дека ние актерите како и секој обичен граѓанин се наоѓаме многу често во неповолни ситуации од нашиот живот, меѓутоа сме ставени во ситуација да тие ги ставаме настрана, на сметка на тоа дека во одреден момент треба да се појавиме на сцена – вели Дончевска Илиќ.
извор: умно.мк
