Градоначалникот на Скопје Петре Шилегов, објави фотографии од новиот изглед на внатрешноста на Универзалната сала во Скопје.
„Некаде на почетокот на јуни на одговор на новинарско прашање, кажав дека влегуваме во изборна кампања и дека во периодот што следи, ќе се изнаслушаме сè и сешто (особено за мене), но и дека немам намера да се занимавам со ниските страсти и изопачената политичка логика на ДПМНЕ, туку дека мојата цел беше, е и ќе биде да се занимавам со проблемите на Скопје и скопјани, кои што скоро 3 децении се таложеа во нашиот град како резултат на нивното некадарно и волунтаристичко водење на градот. Тие последици, тие проблеми ги решаваме чекор по чекор. Работејќи на вистинските негови приоритети и потреби на граѓаните.“, објави Шилегов
Градоначалникот истакнува дека со ова еден од децениските проблеми, еве веќе се решава.
Владата одвои 120 милиони денари, средства од буџетот на државата, за реализација на овој проект од огромно значење за македонската и скопска култура и традиција. Универзална сала, како што рече Шилегов на промоцијата на изведбениот проект за реконструкција на Универзална сала, беше, е и очигледно останува омилена културна институција на многумина скопјани.
Тој тогаш потсети дека идејата да се сочува Универзална сала во постојнатата форма и на постојната локација дојде по опсежна и отворена дебата и додаде оти се слушна волјата на скопјани и на јавноста.
Архитетктот Муча при презентацијата на проектот појасни како таа ќе изгледа во иднина.
– Се задржува постоечката форма, се прави внатрешна реорганизација на просторот, се вметнуваат нови современи материјали во фасадата, пред се поради енергетската ефикасност, но со мали корекции во постоечката конструкција се зголемува и противпожарната заштита, рече Муча. Тој изрази надеж дека Универзална сала наскоро повторно ќе блесне во стариот сјај, како порано.
Ј. Ѓ.
