пишува: ЈАНЕ ЃОРЃИОСКИ
Еднаш реков дека не сме преплавени, туку сме удавени од лажни вести, па додадов – Да не знае човек од што попрво да се пази, што прво да фати да разобличува. И си тече тоа, не застанува.
Како главен извор на дезинформации во студијата од ЕУ објавена лани, покрај Мицкоски кој е во друштво на неговиот ментор Никола Груевски, поименично се наведуваат и медиумите блиски до ВМРО-ДПМНЕ, финансирани од унгарски бизнисмени во Македонија, но во последно време тој примат на главен лажњак во маало, му го загрозува Димче Апасиев, и тоа сериозно е запнат да го престаса.
Еве да земеме само денеска.
Апасиев на социјалните мрежи треска од ракав лажни вести во форма на бројки – „податоци“ за пописот и за тоа не чувствува ни грам одговорност. Но тоа е нели, Димче Апасив, од него ништо чудно и ништо повеќе и не се очекува.
Секако дека тој има мисија да го минира пописот и да нанесе општествена (па ако сакате со повикот на бојкот на Македонците, демографска, а најмногу и етничка) штета, но едно е како политичка партија и лидер на истата да имаш став за одредено прашање, па било тоа и банално – како што е повикување на бојкот на пописот, а сосема друго е да манипулираш со државни податоци за да оствариш политички краткотраен профит.
Во неговата последна манипулација, тој, без око да му трепне вели дека 200.000 Македонци одбиле да се попишат и си се надоврзува дека доволно е само 50.000 граѓани да го бојкотираат пописот за да се смета за невалиден.
И готово?!
Димче има да се врти околу оваа негова лажна конструкција, купишта граѓани ќе му поверуваат, не можејќи притоа да прифатат дека лидер на партија може да е извор на лажни вести. А, е!
За Апасиев и неговите партиски послушници „Имотеп свештеници“, не важат официјалните податоци кои велат дека само за две недели се попишани над 1 милион граѓани. За нив не важи тоа дека ДЗС – институцијата која го спроведува пописот, експресно ги демантира овие лажни вести и вели – Тврдењата за бојкот на пописот се измислени и целосно неточни. Ништо за нив не важи.
Од каде му се овие бројки, знаат само тој и евентуално оној кутар негов партиски пиун „фатен“ инфлагранте како попишувач.
Во ширењето на лажната вест, ќе му помогнат и еден куп медиуми. Едните, нели за да ја запазат „новинарската коректност“ и да не коментираат изјава туку само да ја пренесат измислената бројка, а другиот фрики-курир медиумски куп, намерно ќе ја исфилуваат и злоупотребат. И тоа за жал, е нашата медиумска реалност со која се борими.
Ваквиот Димче Апасиев е претседател на политичка партија која има двајца пратеници во македонскиот Парламент. А тоа пак драги мои, исто така за жал, е нашата политичко-партиска реалност со која се бориме.
Но, што друго може демократско да се очекува од една партија која во изборна програма има пишано дека се залага за признавање на диктаторската и изолирана од цел демократски свет Северна Кореа, или уште повеќе од нејзиниот лидер Апасиев кој е извор на лажни вести и заканувач со закоравен експлицитен говор на омраза кон неистомислениците.
Колку раскринкувања на конструкциите на лажни вести се доволни за да поверувате дека постојат, дека се обидуваат да манипулираат и дека не треба да им се верува, јас не знам, но силно се обидувам да ве натерам да се обидеме заедно да се избориме против тоа.
Текстот е личен став на авторот
