Нуркачите на Нуркачкиот центар „Амфора“ и Клубот за подводни активности „Охрид“ годинава по 17-ти пат ја поставија и украсија подводната новогодишна елка на дното на Охридското Eзеро кај Заливот на коските – Градиште. На еден редок и уникатен начин тие своите новогодишни честитки ги упатуваат до децата со ретки болести на кои им ја посветуваат оваа ретка подводна новогодишна елка, соопштија од центарот „Амфора“.
– Со желби за добро здравје, навремена дијагноза и достапност на лековите кои значат живот за децата со ретки болести по трет пат годинива им ја посветуваме оваа елка токму нив, бидејќи во нивниот живот полн со предизвици им е најпотребна нашата поддршка. Настанот на китење на подводната елка како една своевидна атракција има големо значење за промоцијата на Охрид и претставува уште една причина да се посети Музејот на вода, изјави Јован Секулоски, претседател на „Амфора“.
Лолеска Гордана, грагански активист и член на здружението на граѓани со ретки болести „Живот со предизвици“ им порача на институциите да имаат повеќе слух за пациентите со ретки болести и Владата да го усвои нацрт-документот за Национална страегија за ретки болести со која ке се унапредат политиките за грижа на овој тип на пациенти, се наведува во соопштението.
