Спинот пласиран од неколку медиуми претежно со сомнителна сопственост, потпомогнати и од спин пропагандата на социјалните мрежи, за наводно намерно скратување на химната на Македонија, не им успеа.
Откако Владата го демантираше и го отфрла како чиста дезинформација објавеното од повеќе медиуми и портали за наводно намерно изоставање на одредени делови односно стихови од химната на Северна Македонија за време на официјалниот пречек на бугарскиот премиер Кирил Петков, на социјалните мрежи се појавија повеќе објави кои „признаваат“ дека се работи за спин и дека нема намерно отфрлање на делови од химната.
„За волја на вистината како што објаснија од Воениот оркестар, секогаш се свири скратена верзија од нашата и од химната на гостите. Човек може да се избрза кога доволно не знае и во време на вакви подгреани страсти, ама тоа е.. напиша Божидар Божиновски на својот Фејсбук профил.
И Отец Пимен повикува да не се бара скандал таму каде што нема.
„Де бе луѓе, не барајте влакно во јајцето. Во цел свет државните химни на прием на официјални државни делегации се свират од воените оркестри и без текст“, пишува Отец Пимен.
– Колкави ни се апетитите за големи држави и планинскиот Балкан да го испегламе, пак ќе ни биде мал во однос на соништата, додава Отец Пимен во објавата.
Новинарот Бранко Героски преку објава на фејсбук сакал да каже две работи во врска со ова:
Прво, Владата овој пат е во право, пишува Героски.
Химната не беше скратена, туку беше изведена инструментална верзија на една строфа, при што мелодите на строфите се исти, се повторуваат, пишува Героски
Второ, како што пишува Героски во објавата, му пречел тонот со кој владата бара од медиумите што објавиле шпекулација да го објават демантот.
Воениот оркестар на Армијата согласно воениот и државен протокол се ангажира при пречек на странските државници на највисоко ниво при што секогаш и без исклучок се интонираат инструментални кратки верзии на државните химни, а никогаш не се изведуваат верзии на химните во целост и со стихови и вокали, се наведува во демантот од Владата и додаваат дека е чиста дезинформација дека било кој стих од химната бил скратен бидејќи стихови воопшто не се изведуваат при вакви церемонии.
„Ова е востановена пракса во протоколите за пречек, како во Северна Македонија така и во светски рамки. Дека химните во вакви прилики се изведуваат без вокали и само во инструментална кратка верзија може лесно да се утврди при прегледување на снимките на сите претходни пречеци на државници на највисоко ниво кои ја посетувале Република Северна Македонија достапни на Јутуб каналот на Владата.“, се наведува во демантот.
Ј. Ѓорѓиоски
