Во пресрет на денешниот натпревар со ко-домаќинот на Европското првенство, во таборот на македонската ракометна репрезентација владее оптимизам дека може да се постигне позитивен резултат. Пивотменот Стојанче Стоилов верува во победа и пласман во втората фаза на шампионатот.
– Посакувам со победа да ја израдуваме целата нација. Освен што се домаќини, Австријците со ништо друго не ме плашат. Секако дека имаат квалитетни играчи, но ние можеме да ги сопреме нивните шутери. Посакувам помладите да бидат похрабри и да се прикажат во вистинско светло. Мотив не ни недостасува и верувам во успех на крајот, изјави Стоилов на денешната прес-конференција.
Голманот на македонската ракометна репрезентација Никола Митревски ветува дека тој и неговите репрезентативни колеги ќе одговорат на дефанзивните задачи што е предуслов да се дојде до посакуваната победа над Австрија во 3. коло од Групата Б на Европското првенство.
– Натпреварите се добиваат со добра одбрана. Можеме да ги спуштиме нивните бекови на петнаесетина погодоци, а доколку ги затвориме страничните играчи и нивните пикери, можеме да ги победиме. Со евентуална победа со два-три разлика ќе го анулираме поразот од Чешка, истакна Митревски.
На македонската репрезентација за сигурен пласман и е потребна победа. Почетокот на натпреварот во „Штадхале“ во Виена е во 18 часот и 15 минути.
