Украинското министерство за надворешни работи предупредува дека украинските деца кои се депортирани во руски семејства се соочуваат со закана од „незаконско посвојување“.
МНР на Украина во четвртокот лиферуваше соопштение во кое пишува дека „руските окупатори“ продолжуваат да „ги кршат нормите на меѓународното право и прибегнуваат кон неприфатливи дејства“, вклучително и принудување на раселување на украинските граѓани, како што се децата, пренесува The Hill.
„Во текот на тековната целосна агресија на Руската Федерација против Украина, руските окупатори продолжуваат да ги кршат нормите на Меѓународното право и прибегнуваат кон неприфатливи дејствија – незаконско и принудно раселување на украинските граѓани, вклучително и деца, меѓу кои и сирачиња, деца лишени од родителска грижа, како и деца чии родители загинале како резултат на воената агресија на Русија, преку државните граници на нашата држава до територијата на Русија“, пишува во соопштението на МНР.
Од МНР велат дека постои „еклатантна закана за незаконско посвојување на украински деца од страна на руски државјани без почитување на сите неопходни процедури утврдени со законодавството на Украина“.
Министерството повика голем број власти, вклучително и Канцеларијата на Високиот комесаријат за бегалци на ОН и Канцеларијата на Високиот комесаријат за човекови права на Обединетите нации, „да се креираат итни мерки за враќање на украинските деца на територијата на нашата држава .“
Во соопштението се посочува конвенцијата на Обединетите нации за правата на детето, која, според Министерството, бара од страните во меѓународниот договор, вклучувајќи ги Русија и Украина – да вложат напори да се борат против нелегалното движење и неуспехот да се вратат децата од странство.
Министерството за надворепни работи на Украина наведува дека тоа е „цинично непочитување“ на основните закони и обичаи на војување и човекови права за Русија да се обиде да обезбеди легитимна основа за своите постапки.
„Обидите на Кремљ да обезбеди „легитимна“ основа за своите криминални дејствија на територијата на Украина се цинично непочитување на основните закони и обичаи на војување и универзално признаените човекови права…Кршејќи го Меѓународното хуманитарно право и основните стандарди на хуманост, Русија е ангажирана во државно организирано киднапирање на деца и уништување на иднината на украинската нација“, пишува во соопштението на МНР Украина.
Обработка: И. З.
