Во редакцијата на Фронтлајн повторно пристигна мејл од Загрижени родители кои дадоа свој коментар на реакциите од официјалните лица од Општината на чело со градоначалникот на Карпош. Реакциите пристигнаа откако во Општина Карпош беше донесена одлука, веќе запишаните деца во градинките на териоторијата на Карпош, а се од други општини, во случајов најмногу од Ѓорче Петров, да бидат испишани од градинките до 10 јуни, и да не се запишуваат деца од други општини.
„Нивните објаснувања т.е. објаснувањето на градоначалникот можеби во неговите планови и политички програми имаат логика и сето тоа кажано добро звучеше сѐ до оној момент кога се спомна претходната гарнитура која ја водеше општината. Тука маските паднаа и тука се виде дека дури и од потенцијално корисна одлука, полека но сигурно, се влегува во некој политички реваншизам.
Се спомна општина Ѓорче Петров во реакцијата од општина Карпош, децата кои се запишани во Влае, се пред сѐ запишани од реонот Хром во која градинка има деца од цела општина Ѓорче Петров и нема место за децата од тој реон. А нема место зашто готова градинка во Волково чека на отвoрање и е моментално блокирана, неофицијално, заради политички блокади“, пишува во реакцијата на Загрижени родители.
„Бидејќи поголемиот број деца се токму од оваа општина како што изјави градоначалникот на Карпош, јавно го повикуваме градоначалникот на Ѓорче Петров како планира да го реши овој проблем. Неговите вработени нè известија дека листите за чекање се долги и дека најубаво е да се проба „да се фатат врски“. Го замолуваме покрај решението да даде и официјално насоки каде тие врски да ги фатиме и како овој процес да го објасниме на нашите деца“, пишува во реакцијата.
Тие пишуваат дека не е во ред Владата и ресорните министерства да молчат по ова прашање, бидејќи се засегнати деца и родители од повеќе општини.
Во изјава за Канал 5, градоначалникот на Карпош, Стевчо Јакимовски, рече дека оваа одлука ја најавил уште пред шест месеци, а причината за тоа е немањето место и чекањето на децата кои се од споменатата општина.
„Дури 306 деца од Карпош чекаат место, а местото им го земаат 200 деца од Ѓорче Петров, изјави Стевчо Јакимовски – Градоначалник на Карпош.
Јакимовски најави и изградба на четири градинки, кои ќе бидат наменети исклучиво за карпошани.
И. З.
