пишува: БРАНКО ТРИЧКОВСКИ
Не можам да ја сфатам лефтерноста со која претседателот Пендаровски зборува како Русија се меша во нашите внатрешни работи преку свои луѓе,политичките субјекти и инсталации.
Зборува како театарски критичар за најновата претстава во Македонскиот народен театар.
Кога открива дека “неколку субјекти се во директна корелација со Москва неколку години наназад…
И дека се финансираат од Москва.
Да повториме:Неколку години наназад.
-Сѐ додека тоа е политички артикулирано во институциите, тоа е во ред и тоа е демократски- вели Пендаровски.
Па, како тоа.
Веднаш во продолжение на интервјуто во “Фокус” запаѓа во тешка контрадикција истакнувајки дека му е чудно што неколку дена по руската инвазија во Украина, Левица го повикала рускиот амбасадор во Собрание и го одликувала за неговиот придонес во билатералните односи, што е без преседан. Во ниеден европски парламент не се случило тоа, заклучува претседателот.
Да, претседателе, но тој спектакл со рускиот амбасадор беше направен во врвната институција, односно тоа што го напаѓате во последната реченица, го сметавте за демократски чин во претходната.
Мислам дека ваквото позиционирање на првиот човек на државата не е адекватно на нивото на опасноста и на активностите што ги преземаат руските агенти кои навлегувале од не знам каде и руските инсталации во земјата.
Тоа е спротивно на интересите на Северна Македонија.
Освен тоа, Македонија како членка на НАТО и земја која ги отвори преговорите со ЕУ, има обврска многу порешително да се бори против деструктивните руски влијанија во Македонија затоа што во актуелнава ситуација, тоа се влијанија не само против Македонија, туку и за дестабилизација на овој дел од Европа.
Да, уште нешто: сите државни институции имаат инфирмации за ова!
Што тоа значи, дали дека ситуацијата е под контрола или дека државните институции не си ја вршат работата?
Знам дека е полесно ова да се каже отколку државнички да се дејствува. Имам респект кон деликатноста на некои аспекти на ситуацијата, но сепак, ова што го зборува Пендаровски, не е одговор каков што Македонија очекува од себе и каков што нашите сојузници очекуваат од нас.
