Украинската армија објави дека започнала офанзивни операции во повеќе области вдолж линијата на фронтот во регионот Херсон во јужна Украина, сигнализирајќи го почетокот на широката и долгоочекуваната контраофанзива чија цел е враќање на територијата окупирана од Русија, објави Њујорк Тајмс, пренесе Цивил Медиа.
Борбите по должината на линијата на фронтот нагло ескалираа во понеделникот, според украинските воени и цивилни власти, а украинската влада изјави дека нејзината армија „ја пробила првата одбранбена линија на окупаторот во близина на Херсон“.
Украинската војска, исто така, во понеделникот изјави дека погодила и уништила голема руска воена база зад руските линии во регионот Херсон. Њујорк Тајмс нагласува дека во моментов не е возможно да се верификуваат извештаите и изјавите што доаѓаат од фронтот.
Низ регионот Херсон – чиј главен град беше првиот голем град што падна во рацете на руските сили откако Путин ја нападна Украина во февруари – електричните мрежи беа во прекин среде борбите во понеделникот, а руските медиуми објавија евакуација од градовите во областа, се вели во извештајот на Њујорк Тајмс.
Наспроти овие вести, руската пропаганда побрза да објави дека украинската офанзива за ослободување на окупираните територии доживеала неуспех. Овие тврдења на руската пропаганда беа лансирани веќе по првиот час по интензивирањето на борбите по должината на јужниот фронт во Украина.
Украинските напади врз руските сили на југот од земјата, околу Миколаив и Керсон, започнаа во понеделникот „по директна наредба“ на претседателот Володимир Зеленски, изјави портпаролката на јужната команда на Украинската армија, Наталија Хумениук, во интервју за ТВ Дожд, кој емитува програма на руски, објави Вашингтон Пост. Електронското издание на весникот објави и вести за два артилериски напади на руските сили во областа на најголемата атомска централа во Европа, Запорижија, врз основа на изјавите на локалните власти.
Вашингтон Пост ги пренесува информациите и од Институтот за студии на војната, за помали напади на руските сили во источниот дел на Донецк, вклучително и напади во Словјанск и Бахмут, каде што загинале осум лица во нападите на цивилни цели. Според Укринформ, украинските сили успеале да ги одбијат руските напади и да ги принудат на повлекување.
