Големиот Get EXITed настан во Струмица пред повеќе од 20.000 посетители ги надмина сите очекувања. Журката ја посети и градоначалникот на Струмица Коста Костадинов, кој го потенцираше значењето на овој настан во овој момент.
„Струмица вечерва слави, во очи на големиот 8 септември, ни се случува прекрасен и спектакуларен настан за каков што досега само сонувавме. Вечерва во Струмица се случува Get EXITed и не треба да се трошат зборови за да се сфати вистинското значење на овој музички настан“, рече Костадинов.
Основачот и директор на „Егзит“ Душан Ковачевиќ изрази големо задоволство по повод настанот во Струмица и објасни дека Get EXITed е вовед за фестивалот кој ќе се одржи во 2023 година – „ЕГЗИТ фестивалското семејство во моментов е една од најбрзорастечките фестивалски групации на светот со 12 фестивали во седум држави. Сигурни сме дека сите предуслови се тука за и Македонија да добие еден голем фестивал каков што заслужува. Од 20-годишното работно искуство со ЕГЗИТ, гледам дека тука е присутна енергијата која е потребна за да се случи еден таков фестивал“, проценува Ковачевиќ.
Дел од Get EXITed музичкиот спектакл беше и своевидната винско-гастрономска програма која ги претстави најдобрите винарии и локални произведувачи на традиционалните специјалитети од македонската кујна. Целиот проект е реализиран со поддршка на Владата на Македонија и Општина Струмица, како продолжение на саемот за вино „Винска визија на Отворен Балкан“ кој се одржа пред неколку дена во Белград, а во рамки на проектот „Отворен Балкан“ кој пружа простор за унапредување на туризмот и културната соработка на соседните земји во регионот.
Оваа летна забава за паметење направи одличен вовед за покренување на големиот Егзитов фестивал во Македонија, кој е планиран за следната година и кој ќе стане нова важна туристичка атракција на Балканот, која веќе првата година ги пополни сите сместувачки капацитети во Струмица и околината.
ЕГЗИТ е најголемата организација во музичката индустрија на Југоисточна Европа, која покрај самиот Егзит, кој повеќе од 20 години традиционално се одржува во Нови Сад, има 12 свои фестивали во седум земји. До сега има организирано бројни фестивали и големи концерти, како што се „Но Слип“ фестивалот во Белград, „Си Денс“ и „Ада Дивајн Авејкенинг“ во Црна Гора, „Револушн“ во Романија, „Си Стар“ во Хрватска, „Ековејвс“ во Грузија, „Фестивал 84“ во Босна и Херцеговина, „Санленд“ на плажата Перла во Бугарија, концертите на Роби Вилијамс и Мадона во Белград, „Ред Хот Чили Пеперс“ во Инѓија и многу други.
Мисијата на „Егзит“ од самото настанување е поврзување на регионот и промоција на мирот, како и брендирање на дестинации и збогатување на културната понуда преку развојот на креативните индустрии и фестивалскиот туризам.
Извор: Слободен Печат
