Пишува: АЦО ЛУКАРОСКИ
Сите се бунат за сообраќајниот хаос, само ‘неутралните исташи’ и ‘ФБ експертите’ молчат. Беа најгласни, а сега најмногу молчат. Гласни беа во поддршката за Данела кога се закануваше со тужби заради поседувањето бугарско државјанство. Гласни беа кога Данела ветуваше бесплатен јавен превоз. И кога ветуваше дека од Скопје ќе направи современ европски град. Толку беа гласни, што засипнаа и им се одзеде гласот.
Вака, така, Данела стана градоначалник. Со помош на ВМРО-ДПМНЕ, но и со голема помош на разни ‘камикази’, ‘бениевци’ и на сите останати ‘неутрални исташи’ и ‘ФБ експерти’.
И тогаш почна циркусот. Данела се откажа од исклучително поволната финансиска поддршка од Европската банка за обнова и развој (ЕБОР) за модернизација на сообраќајот во Скопје. Се откажа Данела од тие 188 милиони евра затоа што немаше тогаш ‘мед’ за неа и за ВМРО-ДПМНЕ. Се правдаше со тоа дека ЕБОР немале појма за што даваат пари, па следуваше реакција од ЕБОР во којашто беше наведено дека тие се сериозна институција и дека финансиска поддршка даваат само за квалитетни проекти. Данела се искара и со архитектите и го сопре проектот ‘Универзална сала’. Данела сопре и многу други квалитетни проекти. И како капак на сè, дојде хаосот со јавниот превоз во Скопје.
‘Неутралните исташи’ и ‘ФБ експертите’ и натаму молчат. Молчат и од Левица. А зошто молчат слушнавме од изјавата на Жарко Масларковски кој призна дека Данела во град Скопје вработила повеќе од 30 членови на нивната партија.
Да ги поздравам на крај сите што молчат, со неколку постари и понови изјави од оние што ѝ даваа поддршка на Данела.
Гордана Силјановска Давкова: „Данела, женствена и културна. Информирана и подготвена, со конкретни проекти за реформи. Внесе свежина на мислата и духот, смиреност во дијалогот, одговорност на речта, насмевка и убавина во изразот.“
Александар Николоски: „Ја поддржуваме Данела Арсовска и тоа е доказ дека ВМРО-ДПМНЕ сака да расте. Ги поддржуваме нејзините одлични идеи, проекти и решенија.“
Билјана Ванковска: „Данела ми стана прифатлива и симпатична. Сега немам друг избор освен да гласам за неа!“
Трајко Славевски: „Советот е составен од квалитетни професионалци и ќе ѝ дадеме поддршка на Данела Арсовска.“
Перо Камиказа: „Под притисок на ВМРО ја поддржувам Данела.“
Драган Павловиќ Латас: „Моја проценка е дека Данела е формат за министер, премиер или претседател!“
Игор Дурловски: „Невини луѓе скапуваат по затвори, а ФБ врие за закоченото скопјенце. Одвратно!“
Христијан Мицкоски: „Кога ќе дојдеме на власт ќе го решиме сообраќајот во Скопје.“
Текстот е личен став на Авторот
