Руска ракета доцна синоќа уништи станбена зграда во источниот украински град Краматорск, а во нападот загинаа најмалку три лица, додека 20 се повредени, изјави регионалниот гувернер Павло Кириленко.
„Спасувачите, полицијата и комуналните служби работат на местото на нападот за да ги проверат урнатините на уништената зграда. Веројатно се уште има луѓе под неа“, напиша Кириленко на Телеграм.
Најмалку осум станбени згради беа оштетени, една од нив беше целосно уништена, пренесува Укринформ.
Како што е наведено, непријателот го погодил градот во 21:45 часот. Полицијата ги документира последиците од уште едно воено злосторство на Русија. Екипи на ЦСИ, одреди за бомби, единици К9, патролна полиција и други единици работат на местото на настанот, додека локалното население е евакуирано во локалното училиште, каде што е распоредено засолниште.
Во руски ракетан напад минатиот месец , исто така, врз станбена зграда во источниот град Дњепар загинаа најмалку 44 лица.
„Ова не е повторување на минатото, тоа е секојдневната реалност на нашата земја – земја со апсолутно зло на своите граници“, напиша претседателот Володимир Зеленски на Телеграм.
Во посебен твит, Зеленски напиша дека „единствениот начин да се запре рускиот тероризам е да се победи – со тенкови, борбени авиони, проектили со долг дострел“.
Украина, која минатата недела обезбеди ветувања за борбени тенкови, сака нејзините сојузници да ја снабдуваат со авиони ловци и проектили.
Кириленко објави слика на која се гледа четирикатница која претрпела големи оштетувања.
Украина ги обвинува руските сили за неселективно гранатирање на цивилната инфраструктура, обвинение што Москва рутински го негира.
А. Р.
