Нема никакви дилеми дека парламентарното мнозинство е зајакнато и стабилно, изјави денеска пратеничката на СДСМ и коалицијата, Санела Шкријељ.
– Да немате дилеми дека парламентарното мнозинство е зајакнато и стабилно и дека предлозите за нови министри ќе бидат поддржани. Апсолутно да, рече Шкријељ на денешната прес-конференција во Собранието.
Таа истакна дека пратениците од опозицијата со неприсуството на вчерашната седница кога се гласаше за ратификација на договорите, покажуваат, како што рече, игнорантски однос кон институцијата во која работат, но и кон граѓаните и државата.
– Сепак, и овие придобивки не беа доволни пратениците од ВМРО-ДПМНЕ да се одважат и да ги поддржат законските измени. Пратениците од ВМРО-ДПМНЕ не само што не гласаа, туку и не присуствуваа во салата кога се носеа одлуките, покажувајќи еден игнорантски однос кон институцијата во која работат, но и кон граѓаните и државата. Истото го сторија и за ратификацијата на Договорот со ФРОНТЕКС, но и за измените на Кривичниот закон со кој овој закон се усогласува со Истанбулската конвенција. На ВМРО-ДПМНЕ не им се важни потребите на граѓаните и интересите на државата. Тие се заинтересирани само за одбрана на криминалот, блокирање и кочење на државата на европскиот пат. За таквиот однос неколкупати беа казнувани од граѓаните и повторно ќе бидат казнети, рече пратеничката Шкријељ.
