Разорните климатски промени се случуваат побрзо од очекуваното, а светот се движи кон границата на затоплување од 1,5 степени Целзиусови, што ќе ја достигне за нешто повеќе од десет години, објавија ОН. Температурите забележани во последните години во различни делови на светот предизвикаа бројни катастрофални бури и поплави, топлотни бранови кои ги уништија посевите и огромни суши.
Но, на генерациите што доаѓаат најтоплиот период од 2020-тите ќе го сметаат за релативно студен, дури и ако емисиите на фосилни горива што ја затоплуваат планетата брзо се намалуваат, се вели во извештајот на советодавниот панел на ОН за климата. „Резиме за креаторите на политики“ од 36 страници е синтеза на шест главни извештаи од 2018 година до денес, составени од Меѓувладиниот панел за климатски промени (IPCC).
Извештајот е брутален потсетник дека, иако човештвото има алатки за да спречи климатска катастрофа, сè уште не ги користи овие алатки.
На почетокот на 2030-тите, светот би можел да ја достигне планираната цел да го ограничи зголемувањето на температурата до 1,5 степени Целзиусови во споредба со прединдустрискиот период, што ќе влијае на блиската иднина. Но, шефот на IPCC изјави дека верува оти не е доцна да се изменат работите и го нарече извештајот „порака на надеж“.
Имаме знаење и искуство, технологија, алатки, финансиски средства, всушност сè што е потребно за да се надминат климатските проблеми за кои сме свесни толку долго. Но, во моментов ни недостасува клучна работа – силна политичка волја еднаш засекогаш да ги решиме овие прашања, изјави Хоесунг Ли во видео интервју.
Генералниот секретар на ОН, Антонио Гутереш, реагирајќи на извештајот, истакна дека богатите земји кои се стремат кон јаглеродна неутралност во 2050 година или подоцна, треба да ги забрзаат своите цели и да ги реализираат најдоцна до 2040 година за да ја „деактивираат климатската темпирана бомба“.
Човештвото е на тенок мраз, а тој мраз брзо се топи, рече шефот на Обединетите нации во видео пораката откако експертската група на IPCC го објави својот најнов извештај. Гутереш го спореди со „водич за опстанок на човештвото“.
IPCC јасно посочи дека придобивките за општеството и светската економија од ограничувањето на глобалното затоплување под два степена Целзиусови ги надминува економските трошоци. Деветдневните преговори, кои се одржаа во Интерлакен, Швајцарија, ги обележаа несогласувања околу фосилните горива, убедливо најмоќниот двигател на глобалното затоплување.
Г. Т.
