Утре (3 мај, среда) во Градската библиотека „Браќа Миладиновци“ во Скопје ќе се одржи разговор со Сања Михајловиќ-Костадиновска, авторка на „(Бес)конечни модели на расказот“ – книга за месец мај. Разговорот е во 19 часот во спомен-собата „Т“га за југ“ и е дел од големата кампања „Читаме современи македонски автори“.
„(Бес)конечни модели на расказот“, издание на Бегемот, содржи 80-ина куси раскази поделени во неколку циклуси и тоа: почетнички раскази, иритирачки, деликатесни, ситни, патувачки, вселенски.
– Ефектни, енергични и динамични, минијатурите на Михајловиќ-Костадиновска се одликуваат со една згусната форма, нагласена сликовитост и висок степен на култура на изразот. Истите нудат мошне впечатливи, интересни и возбудливи коментари за видовите нарација кои, несомнено, ќе ја разиграат читателската фантазија и ќе понудат неповторливо читателско искуство. Авторката вешто си поигрува со поривот за раскажување/нарација на еден мошне инвентивен и оригинален начин – ќе запише Лидија Капушевска-Дракулевска.
Сања Михајловиќ-Костадиновска (1982, Скопје) е вонреден професор по шпанска книжевност на Филолошкиот факултет „Блаже Конески“ во Скопје. Ги има објавено романот 517, победник на конкурсот „Новите“ во 2015 г., збирките куси-куси раскази (Бес)конечни модели на расказот (2018), Во Кратки црти (2021) и приказната за деца Сонувалко (2019). Нејзини раскази се преведени на англиски, шпански, словенечки, српски и хрватски јазик во списанија, антологии или посебни изданија, а има учествувано и на повеќе фестивали за кратка проза. Активно се занимава со превод од македонски на шпански и од шпански на македонски јазик и е член на македонското Здружение на преведувачи и толкувачи.
Разговорот со Михајловиќ-Костадиновска е дел од големата кампања на нашата библиотека #ЧитамеСовремениМакедонскиАвтори, а збирката раскази „(Бес)конечни модели на расказот“ ќе биде тема и на Клубот на читатели предвиден за 26 мај.
Разговорот ќе го води книжевната критичарка Александра Јуруковска, а фрагменти од делото ќе чита актерот Андреј Серафимовски.
Кампањата „Читаме современи македонски автори“ започна во септември 2022 година како заложба на Градската библиотека да ги доближи македонските писатели до своите читатели. Претставувањето се одвиваше преку избор на книга на месецот, нејзина постојана промоција на социјалните мрежи, разговор со авторот и клуб на читатели, каде што се дискутира предложениот наслов. Досега во рамките на кампањата беа претставени осуммина автори: Жарко Кујунџиски со „Сфинга на гневот“, Билјана С. Црвенковска со „Девет приказни за госпоѓица Сит“, Игор Станојоски со „Диссомнии“, Ана Стојаноска со „Лебед“, Јулијана Величковска со „Годишни времиња“, Игор Анѓелков со „Двојна експозиција“. Сања Михајловиќ-Костадиновска со„(Бес)конечни модели на расказот“ е последната, осма авторка во првиот циклус од кампањата.
-Нашата желба да им ги доближиме современите македонски писатели на нашите читатели вродува со плод. Разговорите со авторите се посетени, книгите и понатаму се зајмуваат и бараат во сите наши библиотеки, а за неколку од нив сѐ уште има список на чекање. Ова ни дава надеж дека нештата полека, бавно, но сепак се менуваат. Современата македонска книжевна сцена има одлични дела, одлични автори кои пишувајќи на мал јазик се осудени да бидат читани и од помала публика и да се борат „против“ светските бестселери, кои не секогаш се со висок квалитет. Сметаме дека како јавна библиотека нашата задача е токму тоа, да го поттикнеме интересот на читателската публика пред сѐ за домашните автори, кои заслужуваат внимание и прочит – подвлекува Снежана Стојчевска, директорка на ЈУ Градска библиотека „Браќа Миладиновци“ – Скопје.
Кампањата „Читаме современи македонски автори“ со нов циклус од осум автори и осум дела ќе продолжи од септември.
