Грција денеска гласа на парламентарни избори на кои најверојатно нема да има јасен победник, а доколку политичките партии не се согласат на коалиција, се очекува следните избори да се одржат во јули, објавија западните медиуми.
Анкетите предвидуваат дека владејачката конзервативна партија Нова демократија ќе освои најмногу гласови, но поради промените во изборниот систем во земјата веројатно нема да добие доволно за апсолутно мнозинство.
Избирачките места беа отворени во шест часот наутро (7 часот по грчко време), а ќе се затворат во 18 часот. Право на глас имаат нешто помалку од 10 милиони Грци. Во 21 часот ќе бидат објавени првите излезни анкети на шест агенции за истражување на јавното мислење.
Нова демократија предводена од премиерот Киријакос Мицотакис, според анкетите, ќе освои меѓу 31 и 38 отсто од гласовите, а на второ место е левичарската опозициска партија Сириза, која би требало да има 4-7 процентни поени помалку. Агенциите за истражување на јавното мислење велат дека на партиите им требаат повеќе од 45 отсто од гласовите за целосна победа.
Економската криза беше централна тема во текот на изборната кампања, а партиите се обидоа да ги придобијат гласачите со ветувања дека ќе ја зголемат минималната плата и ќе отворат работни места. Растот на цените имаше интензивно влијание врз Грците, чиј животен стандард беше значително нарушен за време на десетгодишната должничка криза.
Неизвесниот исход од изборите ќе доведе до неколкудневни преговори меѓу политичките партии за да се најде заеднички јазик и кохабитација во владата.
Денешниот резултат е референдум или за политичка стабилност или за воведување во влада без кормило, напиша грчкиот весник „Прото тема“ во уводникот на својата насловна страница.
Доколку ниту една партија не победи, грчката претседателка Катерина Сакеларопулу на трите партии со најдобри резултати ќе им даде тридневен мандат за секоја да се обиде да формира влада.
Потоа Сакеларопулу, доколку ниту една партија не успее, ќе назначи привремена влада која ќе ја води земјата до следните избори, за околу еден месец подоцна.
Г. Т.
