Скопје денеска беше прогласен за Европска престолнина на културата за 2028 година на церемонија во Домот на европската историја во Брисел.
На церемонијата, меѓу останатите, присуствуваа и министерката за култура Бисера Костадиновска-Стојчевска и градоначалничката на Скопје, Данела Арсовска.
„Европската комисија донесе одлука – Скопје е избран за „Европска престолнина на културата за 2028 година“. Македонската култура успеа, Скопје заслужено ја доби престижната титула „Европска престолнина на културата за 2028 година“ и денес сите заедно треба да сме горди на нашиот главен град“, истакна министерката за култура Бисера Костадиновска Стојчевска, во објава на Фејсбук..
Таа нагласи дека „одлуката ја соопшти Европската комисија денеска во Брисел, по вчерашната презентација на апликациите на двата града кои беа во потесен избор, меѓу кои и презентацијата на нашата македонска делегација“.
„Скопје ја доби довербата за организација на годината во која ќе се слават македонската и европската култура, во нашиот главен град и во земјава.
Како Влада и Министерство за култура, пред Европската Унија ги докажавме нашите иницијативи, како и целта кон која се стремевме уште од самите почетоци, за што и говорев при моето обраќање на презентацијата во Брисел.
Им честитам на нашите пријатели од Црна Гора, претставниците од прекрасната медитеранска Будва, градот кој беше во потесниот избор со нас.
Изборот на Скопје за престолнина на културата е голем успех за македонската култура. Честа е огромна, а ние сме подготвени да одговориме на предизвикот.
Во овој капитален проект за секој град и држава од Европа се вложува со години однапред и по завршувањето на годината на манифестација.
Препознавајќи ја суштината, вредноста, но и тежината на титулата „Европска престолнина на културата“, Владата, преку Министерството за култура, се обврза на безрезервна поддршка, и финансиска и кадровска и инфраструктурна. Сите национални установи и институции на културата ќе бидат во служба на „Скопје 2028“.
Скопје радост ти ќе бидеш!“, напиша министерката за култура.
Европска престолнина на културата е програма на Европската Комисија започната во 1985 година. Идејата за ЕПК се иницира и започнува во 1985 година по предлог на тогашната грчка министерка за култура Мелина Меркури (актерка). Европската престолнина на културата прерасна во еден од најамбициозните културни проекти во Европа и стана една од најпознатите и најценетите активности на ЕУ. Целта на ЕПК е да се промовира различноста на културите во Европа, да се истакнат заедничките карактеристики и да се поттикне придонесот на културата во долгорочниот развој на градовите.
