Состојбите на македонската политичка сцена, се до тој степен поларизирани што изискува како со нож поделба на јасни и недвосмислени политички блокови: тие кои се за проевропска интеграција и тие што се против, велат политичките аналитичари за „Фронтлајн“, коментирајќи ги актуелните политички збиднувања во земјава, дебатат за парламентарни избори и блокадата на опозицијата за уставните измени воедно и на европскиот пат на државата.
За можна предизборна и постизборна коалиција меѓу опозициската ВМРО-ДПМНЕ и ултранационалистите на Левица, аналитичарите велат дека тоа е невозможно. Според нив, кој и да ја формира идната Влада на Северна Македонија, Левица нема да претставува никакви битен фактор.
– Состојбите на македонската политичка сцена, се до тој степен поларизирани што изискува како со нож поделба на јасни и недвосмислени политички блокови: тие кои се за проевропска интеграција и тие што се против (Левица). Од друга страна ДПМНЕ ќе биде негде ,,на средина“, односно декларативно ќе вели дека е за ЕУ, но дека е против уставните измени што значи дека е против ЕУ. Тоа треба да им е јасно на сите и ќе видиме дали владејачката СДСМ ќе има капацитет тоа да го претстави како ПР и да го искомуницира со јавноста како такво, вели за „Фронтлајн“ – политичкиот аналитичар Благојче Атансоски.
Сметам, додава тој, дека во ниту еден политички сооднос не може Левица да биде коалициски партнер на ВМРО-ДПМНЕ, бидејќи во тој случај ниту една етничко албанска политичка партија нема да сака да партиципира во таква влада.
– И покрај тоа што уставно -правно е возможно, во практика е невозможно да се формира стабилна политичка влада без етничко албански коалициски партнер, што значи Левица е надвор од секаква комбинаторика за постизбирно коалицирање со опозицијата предводена од ВМРО ДПМНЕ, потенцира тој.
Ќенан Алиу – правник по вокација и поранешен градоначалник на општина Желино, за „Фронтлајн“ вели дека било кога да се одржат парламентарните избори, општеството уште повеќе ќе се поларизира под шемата на корпусот субјекти според про- европски и корпусот субјекти според антиевропската позиција.
– Но вистината за ваквите стигматизации не лежи во комплетноста, стигматизациите се прават за дневно-политички поени. Мислам дека Левица на Апасиев ќе се натпреварува сама на претстојните избори. Често дискурсно изгледа дека е блиска до ВМРО-ДПМНЕ, но повторно има нешто уникатно ултранационалистичко во тоа, но без никаков потенцијал за заплашување. Во меѓувреме, мислам дека албанската опозиција ќе се натпреварува како блок и без очигледна изборна стратегија со ВМРО-ДПМНЕ, вели Алиу.
Во моментов има три политички блока и во македонскиот и во албанскиот политички блок. Во македонскиот политички табор има голема проевропска коалиција околу СДСМ, коалиција од неколку партии околу опозициската ВМРО-ДПМНЕ и ултранационалистичката Левица како трета опција.
Во албанскиот политички табор, иако сите партии имаат европски префикс, сепак имаат разлики и дилеми за уставните измени. Опозициската тројка: Движењето БЕСА, Алтернатива и Демократското движење, бараат со уставните измени да се отстрани и референцата од 20 отсто како уставна категорија за албанскиот јазик. Додека, пак, партиите од парламентарното мнозинство ДУИ и Алијансата за Албанците сметаат дека се за оваа иницијатива, но дека сега не е време.
Во политичките кругови на албанските партии се зборува дека на претстојните избори ќе има два политички блока, еден околу ДУИ и Алијансата за Албанците, во кои ќе бидат и новоформираните мали партии и блок албански опозициски партии, што веќе е официјализирано меѓу Движењето БЕСА, Алтернатива и Демократското движење.
Дестан Јонузи
