Шпанската национална полиција во заедничка акција со царинските службеници во јужното пристаниште Алгесирас заплени речиси еден тон кокаин сокриен во контејнери испратени од Јужна Америка, а дрогата припаѓала на Балканскиот картел, објави полицијата на својата веб-страница.
„Балканскиот картел во моментов е најактивен на европско ниво“, се вели во соопштението.
Полицијата тврди дека латиноамериканските групи му испраќаат кокаин скриен меѓу легални стоки во контејнери кои пристигнуваат со брод во шпанските пристаништа. Акцијата започна по дојава за пристигнување на контејнери со „значително количество кокаин“ во Алгесирас, едно од најголемите пристаништа во Шпанија, во провинцијата Андалузија.
Агентите кои подолго време ги истражуваат активностите на Балканскиот картел имале и информации дека оваа група составена од граѓани од територијата на поранешна Југославија барала начин да го преработи тој кокаин. Истовремено, од Колумбија добиле предупредување дека брод од Еквадор, кој се закотвува во Колумбија, има намера да транспортира кокаин до пристаниште во Шпанија.
Полицијата го идентификувала бројот на бродот, а кога запловил во Алгесирас, инспекторите ги отвориле контејнерите и пронашле 415 килограми од дрогата. Врз основа на нови информации дознале дека во Алгесирас пристигнува уште еден контејнер со дрога, па во него пронашле дополнителни 500 килограми кокаин, се наведува во соопштението.
„Проблемите во истрагата за членовите на овие организации лежат во нивната мобилност. Тие се во состојба да патуваат илјадници километри за да одржат состанок. Истрагата продолжува со цел да се идентификуваат сите членови на мрежата и да се уапсат“, извести шпанската полиција.
Засега не се знае дали некој е уапсен при откривањето на контејнерите со кокаин.
Г. Т.
