Државната изборна комисија (ДИК) го поништи гласањето по приговор од Коалицијата „Вреди“ на избирачкото место 2102 во општина Желино – Тетово. По поднесен групен приговор од Коалицијата „Твоја Македонија“, предводена од ВМРО-ДПМНЕ, ДИК го поништи гласањето на избирачкото место 1272 во општина Охрид, и за избирачките места 1194 и 1202, двете во Крушево.
Резултатите од евентуалното прегласување, доколку одлуката на ДИК ја потврди Управниот суд, откако коалицијата „Европски фронт“ најави жалби, може да влијаат на распределбата на мандатите на пратениците во ИЕ 5 и во ИЕ 6.
Според проекциите, од прегласувањето во ИЕ број 6, еден мандат од коалицијата „Европски фронт“ може да оди кај коалицијата ВЛЕН, додека во петтата ИЕ, од коалицијата „Европски фронт“ еден мандат може да оди кај Коалицијата „За европска иднина предводена од СДСМ или Коалицијата „Твоја Македонија“, предводена од ВМРО-ДПМНЕ.
Сите политички партии кои имаат приговори или ја оспоруваат одлуката на ДИК за прегласување на овие избирачки места во ИЕ 5 и 6, во рок од 24 часа од приемот на оваа одлука, можат да се жалат до Управниот суд. Доколку има такви жалби, управниот суд мора да одлучи по нив во рок од 48 часа и да донесе конечна одлука дали ќе има прегласување.
Од ДИК за „Фронтлајн“ велат дека треба да почекаме за да видиме дали ќе има прегласување, бидејќи има рок и за жалби на одлуката на ДИК до Управниот суд.
– Доколку Судот ја потврди одлуката на ДИК, тогаш има прегласување. Резултатите од евентуалното прегласување може да влијаат на распределбата на мандатите во ИЕ 5 и во ИЕ 6. За еден мандат се разговара кој може да премине од еден во друг субјект и во ИЕ 5 и во 6, вели за „Фронтлајн “, Адмир Шабани – портпарол на ДИК.
По одлуката на ДИК реагираше Европскиот фронт кој ја оцени како неправедна и тенденциозна. Скендер Реџепи порача дека нема да се дозволи да се промени легитимитетот на Албанците.
Од коалицијата ВЛЕН очекуваат по прегласувањето на избирачкото место 2102 во општина Желино – Тетово да добијат уште еден пратенички мандат во ИЕ 6, па така од 13 колку имаат според првичната распределба нивната пратеничка група во наредниот собраниски состав може да има 14 пратеници. ДИК сите приговорот ги усвои со еден глас против. „Против“ гласаше потпретседателката на ДИК Дитмире Шеху.
За изборните резултати до ДИК беа поднесени 27 приговори – девет од Коалицијата Вреди, осум од ВМРО-ДПМНЕ, пет од СДСМ и четири од Левица. Според првичните официјални резултати за парламентарните избори што ги објави ДИК, Коалицијата Твоја Македонија предводена од ВМРО-ДПМНЕ има освоено 58 пратенички мандати, по што следуваат Коалицијата Европски фронт предводена од ДУИ со 19 пратенички мандати, Коалицијата за европска иднина предводена од СДСМ со 18, Коалицијата ВЛЕН со 13, а Движење ЗНАМ за наша Македонија и Левица по шест пратенички мандати.
Дестан Јонузи
