Податоците на Државниот Завод за Ревизија наведуват дека Основниот суд Скопје во 2022 година работел со 20 судии помалку и веќе на крајот на 2023 година оваа бројка оди на минус 27 судии. Недостигот од судии делумно се должи на пензионирањето на судиите, чии места потоа останаа непополнети.
– На крајот на 2022 година, Основниот граѓански суд Скопје работеше со 57 судии. Во 2023 година во Основниот граѓански суд Скопје судиската функција ја извршувале вкупно 55 судии, додека во 2023 година се пензионирале 5 судии, а останаа 50 судии. Согласно законот вкупно во овој суд треба да има 77 судии, велат од ДЗР.
Како резултат на недостигот од судии, ревизорскиот извештај покажува зголемување на бројот на нерешени предмети од минатата година. Вакво зголемување е забележано и во извештајот за работата на Судскиот совет.
Основниот граѓански суд Скопје 2023 година ја започна со 18.058 нерешени предмети. Покрај зголемувањето на бројот на нерешени предмети и недостатокот на судии, Граѓанскиот суд Скопје, според ревизорите, се соочува и со недоволен број вработени во правосудната полиција. Со актот за систематизација на Основниот граѓански суд Скопје предвидени се 15 вработувања во одделението за судска полиција, а пополнети само седум.
Во Извештајот на ДЗР за 2023 година се посочува дека судството не го добива законски утврдениот процент од државниот буџет. Средствата кои се издвојуваат од Буџетот за 2023 година за финансирање на Судската власт не го достигнуваат законски утврдениот процент од 0.8% од бруто домашниот производ на Буџетот на Република Северна Македонија, односно одобрените средства во износ од 2.690.800 илјади денари претставуваат 0,3% од БДП и истите се за 58% помали од законски утврдениот лимит, што според ревизорите сериозно ја ограничува работата на судот.
Во клучните утврдени состојби стои дека има отсуство на веродостојни, вистинити и уредени сметководствени документи за потврда на набавната вредност на зградата во која е сместен судот, како и недвижни ствари кои не се евидентирани во сметководствената евиденција на судот поради неизвршено примопредавање на истите.
Дестан Јонузи
