Претседателката на Косово, Вјоса Османи изјави дека потрагата по правда не треба да престане за жртвите на сексуалното насилство за време на последната војна во Косово, јави дописникот на МИА од Приштина.
На денешната конференција организирана од Косовскиот центар за рехабилитација на преживеаните од тортури (ЌКРМТ/QKRMT), Османи истакна дека оваа борба бара извонредна истрајност и храброст.
Мораме да се бориме историјата да не се повтори. Неправдите никогаш не треба да се премолчуваат и не смеат да се остават неказнети одговорните за сторените злосторства. Затоа нашата заедничка борба мора да биде за правда. Оваа борба бара извонредна истрајност и храброст, рече Османи.
Таа го посочи примерот на актуелната пратеничка во Собранието на Косово, Васфије Красниќи, која била силувана од припадници на српските сили во војната во 1999 година, за која рече дека е силен и храбар глас на преживеаните од сексуалното насилство.
– Васфија успеа да го пренесе силниот и храбар глас на преживеаните во Косово и во светот. Ви благодариме што оваа болка на Косово ја претворивте во порака за свесност. Успеавте секаде во светот да докажете дека никогаш не успеаја оние кои мислеа да го обесчестат Косово, затоа што вие сте самата гордост и чест на Косово. Нашата поддршка за вас нема да престане, туку ќе се зголемува и ќе продолжи, изјави Османи.
Премиерот Албин Курти, кој исто така учествува на конференцијата, рече дека, и покрај траумата, преживеаните покажале сила да изградат нов живот. Тој додаде дека поддршката од Владата за оваа категорија ќе продолжи.
– И покрај неизбришливите трауми, преживеаните покажаа сила да изградат нов живот. Како држава и општество одиме напред, додека продолжуваме да работиме на справување со минатото… Почнавме процес на документирање на злосторствата за време на војната во Косово. За да се гарантира родовата чувствителност во овој процес, среќни сме што се ангажира г-ѓа Шихрете Тахири Силејмани (претседателка на ЌКРМТ). Со цел што повеќе да се олесни процесот на аплицирање за признавање на статусот (жртви на сексуално насилство), Владата ќе продолжи да ги поддржува овие организации, рече Курти.
