Панџаб, најнаселената провинција во Пакистан, одлучи да ги затвори училиштата во главните градови зафатени од смогот, преминувајќи на онлајн настава до 17 ноември, додека земјата се бори со рекордно загадување на воздухот.
Во провинцијата, каде живеат повеќе од половина од 240 милиони жители на Пакистан, претходно беа затворени основните училишта и некои ресторани во Лахор, а од улиците беа повлечени авто-рикшите како мерка за намалување на загадувањето.
Министерката Маријум Аурангзеб изјави дека индексот на квалитет на воздухот надминал 1.000, што е значително повеќе од 300, што се смета за опасно. Таа повика граѓаните да останат дома и воведе задолжително носење маски во погодените градови.
