Доналд Трамп рече дека решавањето на украинската криза ќе биде негов главен приоритет откако ќе ја преземе функцијата следниот месец, опишувајќи го Блискиот Исток како „помалку тешка ситуација“.
„Мислам дека треба да го решиме проблемот со Украина со Русија“, изјави новоизбраниот американски претседател за францускиот магазин Paris Match во интервју снимено во саботата и објавено денеска.
„И двете земји губат бројки во кои никој не може да поверува. Стотици илјади војници се убиени“, рече Трамп, одговарајќи на прашање за неговиот главен приоритет на меѓународната сцена.
„И Блискиот исток е секако голем приоритет. Но, мислам дека Блискиот Исток е помалку тешка ситуација од Украина со Русија“, рече Трамп.
„Но, тоа се двете ситуации што треба да ги решиме и мора брзо да ги решиме. Многу луѓе умираат“.
Трамп беше во Париз на саботното повторно отворање на катедралата Нотр Дам по разорниот пожар во 2019 година. Тој се состана со францускиот претседател Емануел Макрон и со украинскиот лидер Володимир Зеленски за време на неговата посета на Франција, негова прва меѓународна посета од неговиот реизбор.
„Имавме добар состанок со претседателот Зеленски“, рече Трамп.
Трамп еднаш се пофали дека може да го заврши конфликтот во Украина за 24 часа.
Во неделата тој на својата платформа Трут Сошал напиша дека „треба да има итен прекин на огнот и да започнат преговорите“.
Тој, исто така, го повтори својот повик до Вашингтон да не интервенира во Сирија каде што долгогодишниот претседател Башар ал-Асад беше соборен од бунтовниците во молскавична офанзива изминатиот викенд.
„Сирија ќе мора да се грижи за себе“, рече Трамп во интервјуто. „Не сме вклучени во Сирија“.
