Граѓаните се жалат на огромната скапотија и дека нема реално намалување на цените со „новогодишната кошничка“.
Фронтлајн посети некои од најголемите маркети во Скопје и констатираше дека моменталните цени опфатени со мерката „новогодишна кошничка“ се поголеми од тоа што беa пред 30 дена пред стапување на сила на мерката, односно пред владата да ја најави мерката.
Според граѓаните со кој разговаравме, трговците 30 дена пред да стапи мерката на сила ги покачија цените повеќе од тоа што беа на продажна цена, за со намалувањето од 10% со мерката да се вратат пак на истата цена. Но, додаваат дека не само што не се вратени на исто, туку се поголеми од тоа што беа пред мерката да стапи во сила.
„Немаме никакви придобивки од новогодишната кошничка. Со мерката на крај на месец ќе излезе дека потрошувачката за основните продукти ни се зголеми на нас потрошувачите за 10%. Значи повеќе пари ќе трошиме за овие производи од тоа што трошевме“, велат револтираните граѓани.
Од организацијата на потрошувачите на Македонија за „Фронтлајн“ велат дека ги следат реакциите на граѓаните и чекаат надлежните институции да постапат.
Од друга страна, министерот за економија и труд Бесар Дурмиши денеска по посета на маркети во Скопје оцени дека цените на производите од новогодишната кошница се намалени за 10 проценти и повеќе. Државниот пазарен инспекторат, пак, како што соопшти директорот Влатко Стојаноски, регистрирал ситни забелешки во однос на означувањето на производите и ситни корекции кај цените на два-три трговски субјекти. Инспекторите не регистрирале отстапување од договореното за поевтинување на производите за 10 проценти во однос на нивната најниска цена во последните 30 дена пред почетокот на акцијата. Листата со производи од акцијата, како што соопштија, од стартните 600 надминала 1.100 и е отворена.
Инфлацијата во месец ноември е зголемена и изнесува 4,3% а зголемувањето е најмногу како резултат на зголемувањето на трошоците на животот за храна и безалкохолни пијалаци за 2.1 %.
Во новогодишната потрошувачка кошничка се опфатени леб и житарици, пекарски производи, месо и преработки од месо, риба, млеко и млечни производи, кондиторски производи, свежо, замрзнато и конзервирано овошје и зеленчук, безалкохолни (газирани и негазирани) напитоци, алкохолни пијалаци (вино и пиво) и друго.
Кампањата ќе трае до 15 јануари 2025 година, а секој производ на рафтовите во маркетите ќе биде соодветно означен.
Дестан Јонузи
