Навивачите треба да очекуваат „непредвидлив“ натпревар кога Реал Мадрид ќе се соочи со Барселона во финалето на шпанскиот Суперкуп в недела, изјави тренерот на „белите“, Карло Анчелоти, откако неговиот тим ја елиминира Мајорка во полуфиналето.
Џуд Белингем и Родриго постигнаа голови во второто полувреме за да му помогнат на Реал да ја победи Мајорка со 3-0, а претходно Барселона го победи Атлетик Билбао со 2-0 во другиот полуфинален дуел.
– Ел Класико е непредвидливо во последно време. Имаше натпревари кои ги добивме лесно, како 4-1 лани во Суперкупот. Ние, исто така, двапати победивме со 4-0 на „Камп Ноу“, додека тие победија со 4-0 на „Сантијаго Бернабеу“. Тешко е да се предвидува каков ќе биде следниот натпревар, бидејќи ќе има многу квалитет на теренот. Очигледно сакаме да бидеме подобри од Барселона, рече Анчелоти по натпреварот со Мајорка.
Реал мечот го заврши без играчот од средниот ред Аурелиен Чуамени, кој беше заменет со Раул Асенсио на почетокот на вториот дел по судир со глави со дефанзивец на Мајорка.
Белингем изгледаше уморно во последните минути, но го заврши натпреварот, додека Валверде беше заменет на 15 минути до крајот од Дани Себаљос.
-Докторот претпочиташе да го извади Чуамени од теренот бидејќи тоа беше удар во главата. Белингем и Валверде беа преуморни. Не очекувавме жештина и тоа влијаеше на ритамот на играта, истакна Анчелоти.
