Јапонската мултинационална компанија за видеоигри, „Нинтендо“ (Nintendo) ја навести втората генерација на својата рачна конзола – „Нинтендо свич 2“ (Nintendo Switch 2). Западните медиуми го откриваат и нејзиниот изглед.
„Нинтендо свич“ – првата ваква рачна конзола беше издадена во 2017 година и стана трета најпродавана конзола воопшто во историјата, по „Плејстејшн 2“ и „Нинтендо ДС“. Новиот модел, според првичните информации, ќе има 8,4-инчен, најверојатно – ОЛЕД-екран и ќе биде поголем од првиот, под претпоставка дека ќе го задржи форматот 16:9. Гласините говорат и дека резолуцијата на екранот ќе биде зголемена од 720п на 1.080п.
Страничните контролери, се вели, повторно ќе може да се одвојуваат од екранот, но со подобрен метод на поврзување. Ќе бидат и поголеми од претходните, коишто според критиките, беа премногу мали за „возрасни“ раце.
Според првичните наводи, „Свич 2“ ќе има и „Енвидија тегра Т-239“ процесор (Nvidia Tegra T239), од 2023 година, со „Кортекс“ јадра. Конзолата ќе користи и „Ампер ГПУ“ единица (Ampere GPU), со „КУДА“ јадра.
