Пишува: ЏАБИР ДЕРАЛА
Замислете свет во кој вистината веќе не постои…
Замисливте?
И?
Го препознавте светот во кој веќе сега живееме? Свет во кој нема вистина… Или свет во кој вистината може лесно да се замени со манипулации, со лаги…
Се согласувам со вас.
Зошто е тоа така?
Светот се наоѓа пред тешка пресвртница, во која авторитарните сили, олигарсите и воените злосторници се обидуваат да создадат нов светски поредок. И добро им оди, барем засега.
Тоа е свет во кој демократијата, човековите права, почитувањето на различностите, правдата и меѓународното право се избришани и заменети со волјата на малкумина. Тие малкумина (ќе) одлучуваат за судбината, животот и смртта на милиони. Свет во кој олигарсите одлучуваат дали ќе има војна или мир, или замрзнат конфликт. Тие (ќе) одлучуваат како ќе изгледа секојдневието на светската популација.
Тоа се тие малкумина што ќе направат сè за богатите да станат уште побогати, а сиромашните да станат уште посиромашни.
Тие создаваат свет во кој луѓето повеќе нема да знаат кои се фактите, бидејќи медиумските, пропагандните машинерии ќе го обликуваат нивното однесување буквално од една во друга минута. Свет во кој слободната волја ќе биде – криминал.
Тоа е тоа. Или не?
Светот бил и во потешка состојба. На крајот, демократијата и демократските вредности ќе победат. Но тоа не може да се случи само од себе. За победа на демократијата, потребно е сите заедно, веднаш, да не речам вчера, да дејствуваат.
Да застанат на страната на вистината, да трагаат по фактите, да ги почитуваат човековите права и слободи и тоа да го бараат од сите, без исклучок.
И ова треба да биде почеток, можеби задоцнет, но почеток на решителната битка за опстанок на човештвото. Бидејќи, човештвото постои само кога постои слободата.
Немаме таков луксуз – не можеме да си дозволиме да останеме само неми сведоци на падот на демократијата.
ПС. Напишав промпт во кој ги пренесов главните поенти од овој текст на ChatGPT. Тој создаде илустрација која, трагично, не е ни оддалеку толку злокобна како што се реалните фотографии од градовите што ги уништи рускиот агресор во Украина – Мариупол, Бахмут и други, или Алепо во Сирија, или израелската армија во Газа… Страотно е ова што се случува. Ако не го гледате тоа, веќе ве проголтал мракот.
Извор: Цивил Медиа
