Владата на Република Српска во петокот предизвика дипломатски скандал прогласувајќи ја германската министерка за Европа Ана Лурман за непожелна, по што таа го напушти ентитетот и ја откажа средбата што требаше да ја има во Бања Лука со лидерите на опозициските партии, јавија српски медиуми, пренесе ЦивилМедиа.
Во образложението на Владата на РС се наведува дека тие ја донеле оваа одлука како „реципрочна мерка“ откако Германија заедно со Австрија во четвртокот го забрани влезот на лидерот на босанските Срби Милорад Додик, премиерот на ентитетот Радован Вишковиќ и претседателот на Народното собрание на РС Ненад Стевандиќ поради загрозување на спроведувањето на Дејтонскиот договор.
„Владата на РС ја прогласува Ана Лурман за персона нон грата во Република Српска и му наредува на Министерството за внатрешни работи да го изведе тоа лице надвор од границите на (ентитетот) при влез на територијата на Република Српска“, се вели во соопштението во кое германскиот министер е прогласен за непожелен.
Во таа прилика се огласи и Додик кој ја навреди германската министерка велејќи и дека е „глупава“.
„Не ми се верува дека е толку наивна што после сите лаги и навреди што ги изрече, само за да и се допадне на сараевската чаршија, очекуваше немо да ги набљудуваме нејзините постапки во РС. Во дилема сум дали е нејзина интелигенција или се водеше од интелигенцијата на опозицијата. И едното и другото се глупави“, напиша Додик во објава на мрежата Х.
Д. Т. / Цивил Медиа
