Руската државна новинска агенција РИА Новости го избриша прилогот за далечинскиот воен оператор со беспилотни летала со седиште во центарот на Москва, откако наиде на реакции кај провоените корисници на Телеграм, кои предупредија дека може да и даде на Украина основа да го таргетира градот, објави независниот руски медиум Медуза.
Во вторникот, РИА Новости, инаку омилен канал за преземање руски пропагандни наративи кај делот про-руски настроени македонски медиуми, објави извештај на својата веб-страница и каналот Телеграм во кој опишува како оператор на беспилотни летала FPV погодил украинска цел во близина на Часив Јар во регионот на Донецк. Беспилотното летало наводно било контролирано со помош на новиот руски систем Орбита, кој им овозможува на беспилотните летала да се управуваат од каде било.
Во придружното видео, операторот на беспилотни летала разговараше за ударот од просторија со поглед на облакодери во Московскиот меѓународен деловен центар, познат и како Град Москва.
„Ние сме над илјада километри оддалечени од локацијата. Операцијата беше успешна“, рече тој.
Објавата беше брзо критикувана од провоените воени блогери.
„Дали сум во право кога разбрав дека по ова видео, ако беспилотно летало камиказа ги погоди московските облакодери, непријателот ќе тврди дека ги гаѓал операторите на дронови? напиша Телеграмскиот канал Романов Лајт.
„Значи, градот Москва одеднаш стана легитимна воена цел. Браво, навистина се покажавте“, рече каналот Империја на злото.
По реакцијата, РИА Новости ја уреди приказната за да ги отстрани сите референци за градот Москва, а подоцна целосно го избриша видеото.
Оригиналниот напис повеќе не е достапен на веб-страницата на агенцијата.
Д. Мишев / Цивил Медиа
