Градоначалничката на Скопје, Данела Арсовска, денеска ќе се обрати пред Уставниот суд каде што се разгледува иницијативата за укинување на Деталниот урбанистички план (ДУП) за градска четврт С3 16 во Општина Ѓорче Петров, донесен на 17 февруари 2024 година. Арсовска, како подносител на иницијативата (Реферат У.бр.158/2024), тврди дека планот е донесен без согласност од Град Скопје и во спротивност со законските процедури и стандардите за урбано планирање.
„Во Деталниот урбанистички план кој општина Ѓорче Петров и Министерството за транспорт ги аминувале без позитивно мислење од Градот Скопје, загрижува небезбедноста на планот,“ посочи Арсовска во објава на Фејсбук. „При катастрофа и криза од природна непогода, се соочуваме со опасност половина Скопје да биде отсечено, бидејќи не е корегиран ДУП-от согласно укажувањата од Град Скопје и согласно стандардите.“
Според податоците што ги сподели, со ДУП-от се предвидува изградба на дури 31 зграда, вклучително и една 21-катница, што значително ја надминува планираната густина на население со Генералниот урбанистички план (ГУП). „ГУП-от предвидува 3.750 максимален број на жители, а ДУП-от 7.244… максимално дозволена нето густина на населеност од 335 жители на хектар, додека со овој ДУП е 648 жители на хектар.“
Арсовска истакнува дека опфатот на планот се наоѓа во втора заштитна зона на бунарското подрачје Нерези–Лепенец, од каде што Скопје се снабдува со питка вода. Таа остро реагира на дозволената изградба во оваа чувствителна зона, каде што – според неа – не смее да има нова индустрија ниту високи станбени објекти.
„А таму, СРЕД НАСЕЛЕНО МЕСТО И ВРЗ БУНАРИТЕ НА ПИТКА ВОДА ЗА СКОПЈЕ, си поминаа изградба на хемиски фабрики за кои ние имаме доставени во 6 наврати сериозни забелешки за незаконитости и неусогласеност со ГУП и не дадовме позитивна согласност, без која не смее да се гради!!!!“ – пишува Арсовска.
Дополнително, градоначалничката предупредува дека „наместо да се дислоцира постоечката индустрија во овој дел, да нема градби, да се заштити просторот, се планира и нова индустрија и еден тон згради.“
Планот, кој бил усвоен на вонредна седница на Општина Ѓорче Петров, опфаќа дел од територијата кај кружниот тек кај Порта Влае кон гаражите на ЈСП „Скопје“, на границата меѓу општините Ѓорче Петров и Карпош.
Сега Уставниот суд треба да одлучи дали планот ќе биде укинат или ќе остане во сила, со оглед на сериозните правни и еколошки импликации на кои укажува Градот Скопје.
Ј. Ѓ.
