Одбраната на воениот командант на Војската на Република Српска, Ратко Младиќ, побара од претседателот на меѓународниот суд во Хаг веднаш да го ослободи со привремена и условна слобода од хуманитарни причини, повикувајќи се на проценките на лекарите дека наскоро ќе почине, јавуваат српски медиуми.
Адвокатот на одбраната Драган Иветиќ го темели барањето, кое судот го објави денес, на фактот дека медицинската служба во притвор на судот на ОН „им кажала на Младиќ и на неговото семејство дека не може да се излечи“ и дека „неговиот животен век сега се мери во месеци“.
Младиќ (83) беше осуден пред Хашкиот трибунал на доживотен затвор за геноцидот во Сребреница и злосторства против човештвото врз муслиманите и Хрватите во БиХ, вклучително и тероризирање на цивилите во Сараево, од 1992 до 1995 година.
Младиќ е во притвор во Хаг од крајот на мај 2011 година, кога беше уапсен во Србија и предаден на Трибуналот.
Како што наведува одбраната во барањето, лекарите се префрлиле од третман на „палијативна нега“ за Младиќ и го информирале пациентот и неговото семејство за ова.
Адвокатот на одбраната Иветиќ изјавил дека „ограничениот животен век на Младиќ е централен хуманитарен фактор на кој треба да му се даде одлучувачка тежина“ во одлуката на претседателката на судот Грациела Гати.
Поради неговата сериозна здравствена состојба, не постои ризик генералот Младиќ да избега, тврди одбраната, осврнувајќи се на случајот на поранешниот лидер на Србите во Хрватска, Горан Хаџиќ, кој беше ослободен на привремена слобода од судот во Хаг поради неизлечива болест и кој почина кратко потоа во Србија.
Д. Т.
