Организацијата Трамп објави создавање нова безжична услуга наречена Трамп Мобајл за која се надева дека ќе им конкурира на американските телекомуникациски провајдери како AT&T, Verizon и T-Mobile.
„Голем дел од она што го направивме… беше фокусирано на технологија за луѓе кои беа недоволно опслужени, без разлика дали тоа беше во крипто или нешто друго, но едно од местата каде што сметавме дека имаше слаби перформанси беше во мобилната индустрија“, рече Доналд Трамп помладиот денеска на настан во Трамп Тауер во Њујорк, пренесува Си-Ен-Ен.
Веб-страницата за проектот рекламира план од 47,45 долари месечно, очигледна референца на мандатите на претседателот Доналд Трамп како 47-ми и 45-ти претседател на Соединетите Американски Држави.
„Со Трамп Мобајл, ќе воведеме цел пакет производи што луѓето можат да ги користат, можат да добијат телемедицина на својот телефон за една фиксна месечна претплата, помош на патот во нивните автомобили, неограничено испраќање пораки до 100 земји низ целиот свет“, рече Трамп помладиот.
Соопштението, темпирано да се совпадне со 10-годишнината од денот кога Доналд Трамп се симна по златниот ескалатор за да ја објави својата претседателска кандидатура во 2016 година, го означува најновото проширување на семејниот бизнис на Трамп во технологија, криптовалути и медиуми.
Организацијата Трамп е главната холдинг компанија за приватните бизниси на претседателот Трамп, а ја водат неговите најстари синови, Ерик и Доналд Џуниор.
